- Publika iha: 26 Junho 2021
Fundasaun Mahein (FM) husu governu liu-liu Ministeriu Interior (MI) atu kuntinua dezenvolve polisia komunitaria iha estatutu Polisia Nasional Timor-Leste (PNTL) nian tuir filosofia katak polisia servisu ho komunidade.
Diretor FM, Joao Almedia, hateten filosofia polisia nian konaba polisia komunitaria ne’e diak tebes hodi halo prevensaun krimi iha baze, la’os akontese tiha mak foin tun ba atua.
“Tanba ne’e ita husu Ministeriu Interior iha revizaun estatutu Polisia Nasional Timor-Leste (PNTL) ne’e, tenke kuntinua dezenvolve polisia komunitaria nafatin labele adapta fali filosofia seluk,” nia dehan.
Tanba ne’e nia dehan, implementasaun polisiamentu komunitaria kada suku iha Timor-Leste laran ne’e la’o diak ona no governu prejisa dezenvolve diak liu tan, nune’e polisia bele servisu besik liu ho komunidade.
“Polisia Komunitaria ne’e kondis ho ita nia situasaun seguransa interna nune’e bele halo seguransa ne’ebe mak diak no seguru ba komunidade,” Diretor FM Almedia hateten.
Nia dehan, polisia servisu ho komunidade mak diak liu duke polisia ida ne’ebe responsivu ka hein problema mak foin fo resposta.
“Ita nia hakarak ne’e polisia ida ne’ebe mak lor-loron iha komunidade nia let,” nia saliente.
Tanba ne’e nia rekomenda ba governu kuntinua dezenvove no suporta polisiamentu komunitaria iha asaun ida konkretu no lori konfiansa ba komunidade nian ba polisia no komunidade sai nain ba seguransa sira.
Iha fatin hanesan Vise Ministeru MI, Antonio Armindo, hateten tuir relatoriu monitorizasaun FM nian ne’ebe mak halo kapas tebes tanba ne’e governu konsidera informasaun sira ne’e importante tebes hodi tulun governu bainhira atu revisaun ba estatutu sira liu-liu iha area seguransa.
“Husi informasaun sosiedade sivil nia hariku tebes informasaun nune’e bele foti dezisaun no finaliza revizaun planu estrateziku Polisia Nasional Timor-Leste nian nune’e bele reflete duni ita nia hakarak,” Vise MI Armindo hateten iha Ministerio Interior, iha Vila-Verde Dili.
Tanba ne’e nia dehan, motorizasaun FM nian reforsa tebes kapasidade polisia nian, tanba ne’e governu tebes prespetiva husi sosiadade sivil nune’e polisia bele hala’o knar diak liu tan iha futuru.