Domingo, Outubro 17, 2021
Total visitors: 584029

Unidade Polisia Maritima (UPM) kaptura ema nain lima (5) ne'ebe komete krimi transaksaun ilegal iha tasi area Cristo Rei, iha munisipiu Dili.

Komandante UPM, Superintendente Polisia, Bazilio de Jesus, hateten sidadaun nain 5 ne'ebe kaptura inklui Timoroan nain 4 no Indonesia 1 no sira halo transaksaun ilegal ba sasan.

Komandante UPM, Superintendente Polisia, Bazilio de Jesus, hateten sidadaun nain 5 ne'ebe kaptura inklui Timoroan nain 4 no Indonesia 1 no sira halo transaksaun ilegal ba sasan hanesan sigaru Joker kaixa 40, motor ida, kareta rua, no truk ida.

"Ita kaptura sidadaun nain 5 ne'e tanba transaksaun ilegal ne'e krimi no ita sei submete ba prosesu," Komandante UPM Superientendente Jesus dehan iha knar fatin Lesidere.

Nia dehan, transaksaun sasan hirak ne'e husi diresaun Atapupu no fatin destinasaun mak kapital Dili no sira utiliza Ro Ahi hodi halo transaksaun ilegal husi tasi maibe lakonsegue.

"Timoroan nain haat ne'e ita sei intrega ba komandu munisipiu Dili hodi submete ba sela detensaun no sidadaun Indonesia ne'e ita intrega ba Embaixada Indonesia no servisu imigrasaun hodi bele deporta fila," nia hateten.

Alende ne'e nia dehan, konaba evidensia ne'ebe sira prende oras ne'e dadaun submete ona ba Komandu Jeral Polisia Nasional Timor-Leste (PNTL) hodi asegura.

Entretantu, Portavoz Polisia Nasional Timor-Leste (PNTL) Superientendente Xefe Arnaldu de Araujo hateten, sidadaun nain 5 ne'e supmete ona ba prosesu tuir lei ne'ebe mak vigor iha nasaun ida ne'e.

"Oras ne'e dadaun sira kumpri ona sela detensaun 72 horas depois ita submete ba primeiru interogatoriu," Portavoz Araujo hateten iha Quartel PNTL, iha Kaikoli, Dili.

Nia dehan, tasi Timor ne'e luan tebes, tanba ne'e komandu jeral orienta ona UPM tenke halo patrulhamentu rutina ba membru sira hodi kontrola transaksaun ilegal iha tasi.

"Ita nia tasi tenke asegura metin tanba transaksaun ilegal sira ne'ebe akontese ne'e dalaruma bele inkliu mos droga, tanba aktividade ida ne'e organizadu," nia informa.

Tanba ne'e nia dehan, PNTL sei la husik liu sidadaun se deit mak komete iha krimi transaksaun ilegal tantu husi tasi ka rai maran, tanba ne'e husu ba sidadaun hotu hakarak halo negosiu tenke liu husi dalan legal labele liu husi dalan ilegal tanba ne'e krimi.

"Ami hetan, halo aprensaun ba imi nia sasan sira, kaptura no submete imi ba prosesu. Imi lakon dobel tanba ne'e husu atu kumpri regras sira ne'ebe eziste iha Timor," nia salienta.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04