- Publika iha: 08 Setembro 2021
Polisia Tranzitu (Poltranz) Munisipiu Dili iha fulan agustu ne'e kuntribui ona reseita hamutuk $25.669 ba kofre estadu.
Komandante Tranzitu Munisipiu Dili, Inspektor Xefe Domingos Gama, hateten orsamentu ne'ebe mak polisia tranzitu Dili hatama ba kofre estadu ne'e liu husi implementasau lei kodigu estrada hodi rekolha osan husi infrator sira ne'ebe mak kontra regras.
"Husi lei ne'ebe ita aplika," Komamdante Tranzitu Dili Gama hateten.
Tanba ne'e nia husu ba motorista hotu ne'ebe mak utiliza kareta ho motor iha kapital Dili tenke kumpri regras, la kumpri polisia aplia tabela infrasaun.
Alende ne'e nia hateten, durante fulan agustu total asidente hamutuk 71 no total evidensia ne'ebe ne'ebe prende hamutuk 226 kompostu husi motor no kareta.
"Evidensia hirak ne'e ita asegura hela iha Komandu Polisia Munisipiu Dili no infrator sira ba selu iha banku lori kuitansi mai mak bele foti fali sira nia kareta ka motor," nia saliente.
Alende ne'e, nia husu ba infrator sira tenke selu iha banku nune'e bele mai foti evidensia hirak ne'e selae liu fulan tolu polisia intrega ba patrimoniu estadu.
Iha parte seluk, motorista Angelo da Silva rekonhese katak kontras regras sinais tranzitu iha Colmera nian tanba halai urgencia ba hospital maibe polisia tilang tiha no prende motor.
"Oras ne'e dadaun hau nia motor para hela iha komandu polisia no hau seidauk bele ba seluk hodi foti tanba la iha osan," nia salienta.
Nia dehan, iha karta infrasaun ne'ebe nia hetan tenke selu $35 maibe nia la iha osan tanba oras ne'e dadaun nia labele halo atividade hodi buka fundus ruma.