- Publika iha: 10 Setembro 2021
Autoridade Inspeksaun Fiskalizasaun Aktividade Economika Sanitaria no Alimentar (AIFAESA) konsegue prende tabaku ilegal hamutuk 548 ne'ebe mak negosiante sira faan ilegal iha merkadu Taibesi, iha kapital Dili.
Inspektor Jeral AIFAESA, Ernesto Monteiro, aprensaun refere liu husi inspeksaun ne'ebe mak ekipa AIFAESA hamutuk ho Servisu Investigasaun Kriminal Nasional (SIKN) halo.
"Aktividade inspeksaun ne'e ita konsegue prende sigaru ho marka Suria hamutuk 548 ne'ebe mak faan ilegal iha merkadu Taibesi," nia dehan.
Nia dehan, tabaku ilegal ne'e prende tanba kontra lei numeru 14/2016 ne'ebe bandu faan tabaku ilegal iha nasaun Timor-Leste.
"Inspeksaun ne'ebe ita halo ne'e mos hodi hanorin ita nia negosiante sira labale sosa no hatama sasan hirak ne'ebe mak lei bandu ona," Inspektor Jeral AIFAESA Monteiro hateten.
Nia hateten, evidensia ne'ebe mak sira prende ne'e asegura ona no sei halo prosesu destruisaun ba tabaku ilegal hirak ne'ebe mak prende ona.
Alende ne'e nia dehan, AIFAESA nafatin buka tuir tabaku ilegal sira iha tiga roda hodi bele halo aprensaun tanba kontra lei, tanba ne'e se mak kuntinua faan nafatin sei aplika multa hahu husi $75 to'o $1,000.
Iha fatin hanesan, negosiante Jose Soares, sente triste tebes ho situasaun ne'e tanba governu seidauk halo sosialiazaun konaba labele faan sasan hanesan sigaru ne'ebe mak sosa fali husi ema seluk ka ilegal, maibe derepente mai prende derepente deit.
"Durante ne'e ami moris ho aktividade sira ne'e sasan ne'ebe ema hatama mai ami sosa ba faan fali, maibe governu prende tiha oinsa ami bele kuntinua ami nia moris bainhira la iha sasan sira ne'e," negosiante tabaku Soares salienta.