Sexta, Março 29, 2024
Total visitors: 766366

Governu liu husi Ministeriu Asuntu Kombate Libertasaun Nasional (MAKLN) hamutuk ho Sekretariu Estadu Kombate Libertasaun Nasional (SEKLN) hapara ona osan ba veteranos hamutuk nain 416 tanba identifika ona falsifika dokumentu hodi hetan osan veteranos.

Governu liu husi Ministeriu Asuntu Kombate Libertasaun Nasional (MAKLN) hamutuk ho Sekretariu Estadu Kombate Libertasaun Nasional (SEKLN) hapara ona osan ba veteranos hamutuk nain 416.

Sekretariu Estadu SEKLN, Gil Monterio ‘Oan Soru’, liu husi aktividade identifikasaun ne'ebe mak halo durante ne'e konsege identifika ona veteranus falsu hamutuk nain 416.

"Veteranos falsu 416 ne'e ita deside no hapara ona sira nian osan ne'ebe mak kada fulan governu apoiu," SEKLN Oan Soru hateten.

Nia dehan, veteranos nain 416 ne'e falsifika dokumento hanesan sira lori sertidaun original duni maibe laos sira nian inan aman nian, maibe ema seluk nian no halo deklarasaun falsu hodi hetan osan.

"Ikus mai sira sai benefisiaria ba osan ne'e, maibe liu husi ekipa identifikasaun ne'ebe identifika hahu husi 2020 mai to ohin loron ikus mai governu hapara ona osan no to'o ohin loron la iha ida mak ba iha edifisiu veteranos hodi presta desklarasaun," nia salienta.

Tanba ne'e nia husu ba veteranos sira atu hatudu honestidade konaba dokumento sira no labele tanba deit osan hodi nega inan ho aman.

Tanba ne'e nia dehan, ema hirak ne'e hapara ona osan ne'e governu foti fila medalia no kartaun tenke intrega hotu ba estadu, hahalok sira hanesan ne'e labele tolera atu nune'e ema seluk labele halo tuir.

Entretantu, Deputadu Jose Agustinho Sequeira Somotxo hateten, ema falsifikasaun dokumentu ba veteranos ne'e barak tebes maibe konsege identifika no hapara ona osan ba sira.

"Ema hirak ne'e sei lakon direitu ba osan no tenke divolve fila medalha ne'ebe mak estadu fo kondekorasaun, nune'e mos tenke prosesu tuir lei," Somotxo Saliente.

Tanba ne'e nia dehan, juramentu no rei bandera ne'e buat sagradu no husu labele atu falsifika dokumentu tanba ema ne'ebe veteranos ne'e fakar naran ba luta dirante 24 anos no sira mak ida direitu ba osan veteranos ne'e.