Sexta, Janeiro 21, 2022

Oras ne'e dadaun, Unidade Patrolimentu Maritima (UPM) halo patrulhamentu lao ain iha tasi ibun tanba ro ne'ebe durante ne'e unidade utiliza at hotu ona.

Komandante UPM, Superintendente Polisia Basilio de Jesus, hateten ro ne'ebe mak durante ne'e sira utiliza ba patrulha hamutuk 4.

Komandante UPM, Superintendente Polisia Basilio de Jesus, hateten ro ne'ebe mak durante ne'e sira utiliza ba patrulha hamutuk 4 mak inklui Kayrala, Lusitania, no lancha kiik rua maibe ro hirak temi kondisaun at ona.

"Dadaun ne'e ita halo patrulhamentu lao ain deit iha tasi ibun tanba ita la iha ro hodi movimentu iha tasi laran," Komandante UPM Jesus hateten iha knar fatin, iha Licedere Dili.

Nia dehan, ro tolu ne'ebe at ne'e ida governu China mak apoiu, seluk sosa ho osan estadu nian, iha 2011 liu ba no agora dadaun grave tebes.

"Situasaun hirak ne'e sai obstaklu bo'ot ba ita atu ezerse ita nia funsaun ho diak liu-liu atu halo patrulhamentu rutina hodi asegura tasi ne'e difisil tebes," nia salienta.

Alende ne'e nia dehan, iha postu Suai Loro desde 2014 to'o 2021 seidauk iha ro ida hodi apoiu patrulha ka kontrola iha tasi parte sul, liliu parte Munisipiu Suai.

"Ita ro laiha, labarik sira iha ne'eba halo deit movimentu patrulha lao ain deit hodi asegura aktidade ilegal sira," nia informa.

Nia hateten preokupasaun sira ne'e halo ona proposta ba Komandu Jeral PNTL no Ministeriu Interior maibe seidauk iha resposta.

Entretantu Vise Ministru Interior Antonio Armindo hateten, proposta simu ona no tau ona prioridade iha plano orsamentu 2022 nian nian nune'e bele responde ekipamentu ba UPM.

"Ita husu dadaun ne'e UPM aguenta lai halo patrulha ho kondisaun ka meios seluk ne'ebe mak sira iha hodi halo partulhamentu," Vise MI Armindo hateten.

Nia informa, dadaun ne'e Unidade Patrolimentu Maritima UPM kopera ho forsa marinha hodi utiliza lantas ne'ebe sira iha hodi apoiu operasaun iha tasi.

"Ita sei esforsu nune'e ita bele responde ro patrulhamentu ba UPM nune'e sira bele asegura tasi ho diak," nia salienta.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04