- Publika iha: 21 Dezembro 2021
Governu seidauk halo instalasaun postu bombeiros ba munisipiu tolu (3) inklui iha Manatuto, Liquica no Ermera tanba la iha rekursus humanu no ekipamentos.
Komandante Bombeiro Nasional, Claudio da Silva, hateten dadaun ne'e ekipa bombeiros halo hela treinamentu ba membru foun sira nune'e mos halo preparasaun ba ekipamentu sira nune'e bele finaliza tiha instalasaun bombeiros iha munispiu hotu iha Timor-Leste.
Nia dehan, tuir kriteriu atu instala postu bombeiros ba munisipiu sira tenke iha membru maximu 30, minimo 20, no kada postu tenke iha kareta tanke rua no kompleta tan ekipamentu seluk hodi salvaguarda ba membru sira bainhira halo intervensaun ba insendu sira.
"Dadaun ne'e ita prepara ona membru bombeiros hamutuk 50 tuir hela formasaun nune'e konaba kareta tanki ita prepara ona rua, falta ekipamentu protesaun ba membros sira mak ita seidauk iha maibe ita preve ona iha orsamento do jeral do estadu no hela deit ona aprovasaun," Komandante Bombeiros Nasional Silva hateten.
Tanba ne'e nia dehan, preparasaun ba instalasaun postu bombeiros iha munisipiu tolu Manatuto, Liquica no Ermera preparadu ona no iha tinan 2022 ne'e bele estabelese ona postu bombeiros iha munisipiu tolu ne'e.
"Posto bombeiros ne'e importante tebes hodi bele instala iha munisipiu hotu iha Timor nune'e bele halo intervensaun lalasi ba insedu sira nune'e inundasaun no dezastre naturais sira," nia dehan.
Entretantu, Prezidente Autoridade Munisipiu Manatuto, Fernado de Sousa, hateten munisipiu Manatuto presija tebes postu bombeiros ida ne'ebe besik hodi halo atendimentu lalais ba kazu insendu sira ne'ebe akontese.
"Ezemplu ita hare hanesan iha tinan kotuk ahi han merkadu no komunidade nian uma kuaze 74 ne'e la hetan intervensaun lalais hodi salva komunidade no negosiante sira nia sasan tanba ezistensia bombeiros iha munisipiu la iha," Admistrador Manatuto Sousa dehan.
Nia dehan, insendu ne'ebe akontese iha momentu ne'e bobmeiro ba duni maibe tarde tanba distansia dok tanba sira husi postu Baucau mak ba fali Manatuto.