- Publika iha: 09 Maio 2022
Komando Jeral Polisia Nasional Timor-Leste (PNTL) husu Governo liu husi Ministero Interior (MI) atu halo rekrutamento ba membro foun tanba dadaun ne’e instituisaun PNTL infrenta hela problema menus rekursu humanu hodi koloka ba postu seguransa sira iha rai laran.
Komandante Jeral PNTL, Komisario Faustinho da Costa hateten dadaun ne’e posto polisia balun la funsiona tanba la iha rekursu hodi destaka hodi asegura seguransa ba komunidade iha teritorio laran inkliu iha linha fronteira.
Nia dehan, durante ne’e membro ne’ebe mak hala’o knar hanesan polisia hodi asegura komunidade hamutuk 4,000, maibe barak mak mate ona, barak mos mak hetan dimisaun ka hasai husi PNTL.
“Ho situasaun hirak ne’e mak dadaun ne’e ita infrenta problema menus rekursu hodi koloka ba posto polisia hodi asegura seguransa ba komunidade sira,” Komandante Jeral PNTL Komisario Costa hateten iha Dili.
Tanba ne’e, nia husu ba governo liu husi MI atu halo rekrutamento ba membro polisia foun nune’e bele koloka ba postu polisia sira ne’ebe mak to’o ohin loron la funsiona tanba la iha rekursu humanu.
“Tuir lolos ne’e kada posto ita koloka membro nai 9 nune’e bele halo rotasaun maibe tanba la iha rekursu ita koloka deit nain 3. Ida ne’e la sufisiente,” nia salienta.
Enkuanto nia dehan, husi komando aprejenta ona pedidu ba iha Governo, maibe to’o agora seidauk iha resposta konaba pedido refere.
Entretanto, Vise Ministru MI, Antonio Armindo hateten, governo mos rekonhese katak polisia menus rekursu humanu hodi hala’o servisu iha tereno nune’e mos destaka iha postu sira.
“Ita hetan orientasaun verbal hosi Sua Exelencia Primeiru Ministru hanesan Ministru Interior no husu komando aprezenta dadus ba ofisias hira, sarjentu hira, ajente hira, sira ne'ebe mak moras, difisiesia mental ho difisiensia fizika hodi aprezenta ba governo nune’e bele hare katak ita presija rekruta membro nain hira,” VMI Armindo hateten.