- Publika iha: 09 Maio 2022
Forsa Estadus Unidus Amerika (EUA) apoio kapasita membro Polisia Nasional Timor-Leste (PNTL) liu-liu iha Unidade Espesial Polisia (UEP) konaba oinsa halo eleminasaun no destruisaun ho seguru ba material esplozivu funu nian hodi asegura seguransa ba povu.
Embaixador EUA iha Timor-Leste, Tom Daley, hateten EUA pronto apoio UEP liu-liu konaba eliminasaun material funu nian ne’ebe povu sira hetan iha to’os, natar hanesan, kañaun, no granada.
“Forsa EUA apoiu formasaun ba membro Unidade Espesial Polisia (UEP) hodi hasa’e sira nia kapasidade konaba oinsa halo eleminasaun ba material esplozivu funu nian no seguru,” Embaixador EUA Daley hateten iha Bairupite Dili.
Nia dehan, material esplozivu funu nian, ne’e maske kleur ona, maibe balun ne’ebe mak seidauk nakfera, hamosu perigu tebes ba ema nia vida.
“Ita apoiu hodi dezenvolve kapasidade polisia nian oinsa detekta ho halo eleminasaun ba material esplozivu sira nune’e mos dezenvolve abilidade ba identifikasaun ameasa sira,” nia informa.
“Kapasitasaun ne’ebe membro UEP sira hetan oinsa bele proteje diak liu tan ita nia komunidade liu husi material funu nian ne’ebe mak balun to’o agora sei ativu hela,” Komandante Jeral PNTL, Komisario Faustinho da Costa dehan.
Tanba ne’e, nia dehan, presiza duni membru sira hetan kapasitasaun iha area tekniku no tatiku polisial bele apoia no garantia susesu misaun PNTL nia hodi fo seguransa ba ema hotu iha Timor-Leste.
“Ita hotu hatene Timor-Leste sei iha restu material funu segunda Guerra mundial nian no iha tempu Indonesia nian ne’ebe mak abandona hela iha territoriu nasional. Karik ita la atende, bainhira rebenta arbiru mak bele hamosu perigu bo’ot ba populasaun,” nia salienta.
Komandante Jeral Costa agradese tebes ba formasaun kapasitasaun ne’ebe mak forsa Estado Unidos Amerika sira oferese.