PNTL Husu Kondutor Labele Koalia Telefone Bainhira Sirkulasaun

Polisia Nasional Timor-Leste (PNTL) husu kondutor transporte publiku no privado nune’e mos motorista sira bainhira halo sirkulasaun labele koalia telephone ka halimar telefone tanba ne’e risku ba asidente trafiku.

Portavoz PNTL Superientendete Xefe Armando Monteiro hateten, asidente ne’ebe mak akontese durante ne’e no rejisto mate hamutuk 23 ne’e kauza husi halimar telefone ka koalia telefone hodi halo sirkulasaun ikus mai mosu asidente.

Nia dehan, bainhira halo movimento tanto motorista ka kondutor transporte publiku no privado atu simu telefone ka telefone ema ruma tenke para tiha kareta mak koalia labele halo movimento hodi koalia telefone tanba ne’e la iha konsentrasi ba dalan.

“Asidente trafiku ne’ebe ita rejisto hamutuk 749 no lakon vida 23, kauza husi bainhira halo movimento hodi halimar telefone iha kareta laran,” Portavoz PNTL Superientendente Xefe Monterio hateten.

Tanba ne’e husu ba kondutor no motorista sira labele koalia telefone bainhira halo hela movimento ho kareta kamotor iha dalan publiku tanba ne’e risku ba ema nia vida.

“Ita husu sira nia konsiensia hodi halo tuir regras ne’ebe mak polisia fo sai nune’e bele prevene asidente trafiku,” nia salienta.

Entretanto, Motorista Jaime da Costa hateten maioria kondutor sira sempre halo movimento hodi koalia telefone, bainhira sira atu soke ema mak sira foin hakfodak no fo sala ema.

“Ita husu polisia tenke aplika regras ne’ebe mak rigorozu ba kondutor sira ne’ebe mak koalia telefone hodi lori kareta ka motor iha dalan publiku tanba dalaruma sira kondus hela kareta no motor maibe sira la iha konsentrasi no akotese asidente ikus maibe ema balun lakon vida,” nia dehan.

Nia dehan, polisia mos tenke kontrola ema sira ne’ebe mak uza estrada publiku hodi treino kareta ka motor, tanba ne’e mos kria asuidente trafiku.