- Publika iha: 19 Dezembro 2022
Polísia halo ona prosesu ba sidadaun na’in-haat (4) kompostu husi ema China na’in-rua (2) no Indonézia na’in-ida (1) no Timor-Leste na’in-ida (1) komete atividade ilísitu ilegál ho tipo toto bola online iha kapitál Díli.
Portavós Polísia Nasional Timor-Leste (PNTL) Superientendente Xefe Arnaldo de Araujo dehan, sidadaun na’in-haat (4) polísia kaptura banhira hamutuk ho ekipa Inspesaun Jerál do Jogo husi Ministério Turismo Comércio e Indústria (MTCI) iha momentu sira halo hela jogo toto bola online ho ilegál iha área Delta 4 suku Comoro.
“Ita kaptura sidadaun na’in-haat ne’e tanba realiza atividade jogo toto bola ne’ebé mak la rejistu iha MTCI tanba ne’e ita konsidera illegal. Ne’e krime tanba kontra lei 322 kódigu penál,” nia dehan.
Nia dehan, sidadaun na’in-haat kompostu husi sidadaun China na’in-rua ho inisiál GLG tinan 53, HM idade tinan 50, nune’e mós sidadaun ida husi Indonézia ho inisiál DI idade 45, no AF idade tinan 31 sidadaun Timor-Leste nian.
“Sidadaun na’in-haat ne’e ita kaptura ho flagrante de lito no submete ba sela detensaun durante oras 72, no ita kontinua prosesu ba tribunal tuir lei, artigu 322 kódigu penál,” Portavós PNTL Superientendente Xefe Araujo dehan.
Nia dehan, iha prosesu kapturasaun ne’e polísia ho ekipa Inspesaun Jerál Jogu nian halo kedas aprensaun ba evidénsia.
Xefe Departamentu Inspesaun Jerál Jogu iha MTCI, José Miranda da Costa dehan, jogu toto bola ne’e maioria realiza husi sidadaun China sira, balun hetan rejistu, balun ilegál de’it, ida ne’e tenke hapara.
“Jogu ilegál ne’e kontra dekretu lei númeru 6/2009 iha artigu 322 kódigu penál nian tanba ne’e ita tenke hapara sira-nia jogu no prosesu tuir lei,” nia hatete.
Nia dehan, iha kapturasaun ba sidadaun na’in-haat ne’e mós ekipa Inspesaun Jerál Jogu nian sita ona ekipamentu evidensia sira inklui TV Screen, komputadór, osan no router, no evidénsia hirak ne’e entrega ona ba polísia hodi bele halo prosesu.
“Ita la taka dalan ba ema sé de’it atu loke atividade jogu iha Timor-Leste maibe sidadaun nasionál no estranjeiru maibé tenke rejistu hodi hetan autorizasaun husi governu nune’e labele hetan intervensaun,” Xefe Departamentu Inspesaun Jerál Jogu nian Costa salienta.
Tanba ne’e nia dehan, ba oin Inspesaun Jerál Jogu nian nafatin koopera ho parte polísia hodi halo operasaun ba jogu ilísitu sira ne’ebé realiza iha kapital Díli tanba ne’e husu atu rejistu.
Iha parte seluk Komunidade Delta-4 Marcos de Jesus dehan, jogu sira ne’e tuir loloos ne’e labele autoriza tanba benefisu ne’e la’ós ba Timoroan maibé ba na’in ba jogu sira.
“Jogu ne’e ita haree komunidade ladun komprende, maibé ema estranjeiru lori jogu sira ne’e mai lori bosok komunidade nune’e bele lori osan ba estraga iha sira-nia jogu,” nia hatete.
Nia apelu ba governu no PNTL presiza kontrola jogu hirak ne’e, nune’e mós governu presiza taka jogu sira ne’e hodi labele sirkula tan iha rai-laran.