Defensoria Públika Nafatin Asegura Tribunal Movel Iha Área Rurál

Defensór Jerál Cansio Xavier hatete, defensoria públika nafatin asegura programa tribunal movel hodi fasilita komunidade iha área rurál asesu besik ba justisa iha territóriu laran.

Nia dehan, iha tinan 2022 julgamentu ba kazu iha área rurál liuhusi tribunal movel refere hamutuk 201 kompostu husi kazu violasaun seksuál, violénsia doméstika, kazu ba rai, nune’e mós kazu homesidu.

“Kazu 201 ne’e tribunal movel ba halo julgamentu iha Ermera, Natarbora, Uatucarbau, Pasabe, Iliomar, Baucau, Liqiuçá, tanba vítima sira la iha kbiit atu mai halo julgamentu iha tribunal. Ita lori tribunal ba besik sira,” nia hatete.

Tanba ne’e tribunal nafatin asegura tribunal movel ba área rurál hodi fasilita komunidade asesu besik ba justisa no la presiza mai to’o iha tribunal distritál sira.

Iha parte seluk Diretór Ezekutivu Judicial System Monitoring Program (JSMP) Ana Paula Cortereal dehan, monitorizasaun ba julgamentu movel mekanizmu ida-ne’ebé lori justisa hakbesik ba sosiedade liu-liu iha área rurál ne’ebé mak susar tebes atu asesu edifisiu tribunal.

“Ita haree kestaun tanba distánsia do’ok, ita haree tribunal movel ne’e hanesan meiu ida hodi justisa hakbesik ba komunidade, atu sira labele gasta osan barak liu hodi mai to’o tribunal distrital no ikus balun sai vítima maibé lakohi mai tribunal tanba osan la iha,” nia dehan.

Tanba ne’e nia dehan tribunal movel ne’e tenke ativu tanba ema barak mak presiza tebes justisa no kazu barak iha tribunal tenke pendente tanba tribunal movel la iha.

“Ita hakarak tebes tribunal movel ne’e tanba iha kazu balun iha Suai, tribunal iha Suai Vila kazu akontese iha Bobonaro iha área rurál ida bainhira atu mai tenke seluk ojek ho montante $50 dolar ba mai, mai to’o tribunal adia tan tenke fila fali. Ida-ne’e mak halo sosiedade barak mak la asesu ba justisa, maibé husi tribunal movel bele fasilita sira,” nia hatete.

Tanba ne’e nia dehan, kazu ida akontese bainhira prosesu tenke iha testemuña, vítima, no arguidu, no ema ne’ebé vítima tenke sai vítima ba dala rua, tanba tenke gasta no testemuña ida-ne’ebé mak hakarak kontribui ba justisa ne’e, nia lakohi kopera tanba nia tenke gasta osan, maibé ho programa tribunal movel fasilita tebes justisa ba komunidade.