Sexta, Março 29, 2024
Total visitors: 766366

Unidade Polísia Marítima (UPM), la iha ekipamentu salvavamentu hodi salva komunidade bainhira hetan dezastre iha tasi laran.

Unidade Polísia Marítima (UPM), la iha ekipamentu salvavamentu hodi salva komunidade bainhira hetan dezastre iha tasi laran.

Komandante UPM, Superientendente Eugenio Pereira dehan polísia marítima nia misaun mak servisu atu responde liuba iha área marítima nian.

"Ita iha misaun atu ezerse responsabilidade liu-liu haree ba área marítima atu bele halo prevensaun ba aktu krime organizadu sira ne’ebé akontese iha área marítima nian nune'e mós salva komunidade bainhira akontese dezastre, maibé ita la iha ekipamentu salvamentu," nia dehan.

Nia dehan, durante ne'e sira halo servisu hodi kontrola tasi maibé sira la utiliza ekipamentu salvamentu hodi asegura vida komunidade nian.

"Ita la difikuldade de’it ba ekipamentu salvamentu, maibé ita iha difikuldade mós kona-ba transporte iha área marítima," Komandante Pereira dehan iha Kuartel UPM, iha Licidere, Díli.

Nia dehan, maské sira hasoru difikuldade hirak ne'e maibé sira ho firmeza nafatin responde ba misaun ne’ebé hatuur ona.

Enkuantu nia dehan totál membru UPM ne’ebé mak durante ne'e hala'o misaun iha area maritime nian hamutuk na’in 160 hodi destaka iha postu 20 no iha ró laran.

Entretantu, Diretór Ezekutivu Fundasaun Mahein (FM) nian, Abel Amaral dehan governu presiza investe iha UPM tanba sira la’ós hala'o servisu iha tasi de’it maibé sira mós apoiu seguransa iha rai-maran.

"UPM ne'e la’ós foin falta ekipamentu maibé uluk kedan. Governu eziji tenke asegura tasi Timor husi atividade ilegál sira maibé governu rasik lakohi investe hodi fasilita sira-nia servisu ida-ne'e oinsá," nia hatete.

Tanba ne'e nia dehan, ezisténsia UPM ne'e ba dala 20 ona no merese hodi investe nune'e bele dezenvolve no moderniza sira-nia servisu kontrolu iha tasi.