Polísia Tránzitu Fortifika Kontrolu Negosiante Okupa Trotoar

Polísia Tránzitu fortifika kontrolu hodi hapara negosiante sira ne’ebé okupa trotoar leten hodi faan sasan, tanba nia implika ba vida komunidade la’o ain nian.

Komandante Tránzitu Seguransa Rodaviaria Nasional, Superientendente Asistente Luis da Costa dehan servisu kontrolu ne’ebé mak polísia halo ba negosiante hirak ne’e bazei ba lei kódigu estrada númeru 6/2003 artigu 43 ne’ebé bandu halo negósiu iha trotoar.

“Iha trotoar ne’e direitu ba utilizasaun tuir artigu 93 kódigu estrada ne’e, ema la’o ain nian, bainhira utiliza fali halo negósiu, ne’e kontra lei, tanba nia implikasaun fali ba komunidade la’o ain sira-nia vida,” nia hatete iha servisu fatin Kaikoli, Díli.

Nia dehan, tanba ne’e polísia tránzitu aplika lei hodi fortifika kontrolu ba negosiante sira ne’ebé okupa trotoar hodi halo negósiu ne’e, polísia tenke hapara hotu tanba ne’e husu negosiante sira tenke koopera hodi kumpri lei.

“Ita sei halo operasaun hahú husi terminál Bekora to’o Tasi-Tolu atu bele kontrola negosiante sira ne’ebé mak la kumpri orden, ami sei kumpri orden hodi hasai obrigatóriu negosiante okupa trotora leten,” Komandante Costa dehan.

Tanba ne’e nia dehan, fatin halo negosiu mak markadu ne’ebé mak legal ona, la’os trotoar leten, se la hatene fatin merkadu ba husu jestaun merkadu munisipiu Díli, no polísia nafatin kumpri orden hodi aplika lei.

Entretantu, komunidade Marcia Sequera dehan, negosiante sira ne’ebé hala’o negósiu iha trotoar leten ne’e la iha konsiénsia, tanba polísia halo atuasaun bei-beik ona maibé sira nafatin la kumpri orden no kontinua faan hodi okupa ema la’o ain nia dalan.

“Ita husu atu polísia bele aplika lei ne’ebé mak bandu negosiante faan iha trotoar leten ne’e ho sériu, nune’e sira bele kumpri sela’e sira kontinua okupa espasu asesu ba ema la’o ain iha dalan públiku,” nia dehan.

Tanba ne’e nia dehan, durante ne’e komunidade la’o ain sira liu-liu iha tempu lokraik ne’e hakarak ka lakohi tenke atravesa husi estrada klaran tanba trotoar leten ne’e negosiante sira okupa hotu hodi faan sira-nia produtu.