Forsa Naval Iha Ona Kapitaun Ró Na’in 60

Falintil Forsa Defesa Timor-Leste (F-FDTL) ni-nia Komponente Forsa Naval Lijeira, iha ona kapitaun ró hamutuk na’in 60 ne’ebé mak durante ne’e opera rasik ró hodi kontrolu tasi, nune’e mós prepara hodi simu ró rua ne’ebé sei oferese husi Governu Australia.

Komandante Komponente Naval Kapitaun Mar no Guerra Higinho das Neves dehan, membru na’in 60 ne’ebé sai ona kapitaun ró, tuir formasaun espesífiku hodi opera ró iha Australia, durante tinan haat nia laran, no sira fila mai bele lori rasik ró naval nian hodi halo operasaun iha Tasi-Timor.

“Atu dehan, katak ita iha ona kapitaun ró na’in 60, membru hirak ne’e Falintil Forsa Defesa Timor-Leste (F-FDTL), liuhusi Komponente Naval rasik,” nia dehan.

Nia dehan, kona-ba rekursu hodi utiliza rasik ró Komponente Naval nian sufisiente no preparadu ona, liuhusi formasaun ne’ebé sira hetan.

“Ita mós iha hanoin atu sosa ró bo’ot ida ho metru 75, iha tinan ida-ne’e hodi bele fasilita atividade operasaun iha tasi hodi asegura tasi Timor husi krime kontrabandu ne’ebé atravesa husi marítima,” Komandante das Neves dehan iha knaar fatin Hera, Díli.

Enkuantu nia dehan, dadaun ne’e membru na’in hirak ne’e fó hela formasaun kona-ba marineiru nian ba membru na’in 20 iha Komponete Naval, aleinde formasaun, sira mós bele aprende nafatin.

Entretantu, reprezentante Defesa Australia iha Timor-Leste Coronel Paul Pembroke dehan, membru komponente naval na’in 60 ne’e hetan ona formasaun liuhusi akordu entre Embaxada Australia iha Timor-Leste liuhusi Kooperasaun Defesa Australia no F-FDTL kona-ba apoiu kapasitasaun, ekipamentu, no infraestrutura.

“Liuhusi kooperasaun ne’e governu Australia mós sei entrega Navio Repúblika Demokrátika Timor-Leste (NRDTL) Aitana hodi apoiu servisu patrolla no sei opera rasik husi membru na’in 60 ne’ebé mak ita prepara ona,” nia hatete.

Nia dehan, ró ne’e iha tempu besik sei entrega, tanba ró ne’e prepara ona dezde tinan 2021.

“Ró ne’ebé mak sei entrega ne’e hodi fornese seguransa di’ak no kualidade ba iha tasi Timor,” Coronel Pembroke dehan.