- Publika iha: 28 Julho 2023
Polísia Sientífika Investigasaun Kiminál (PCIC) iha ona ekipamentu espesífiku ne’ebé oferese husi governu China hodi asesu ba servisu Interpol no fasilita kapturasaun mandatu internasionál.
Diretór Ezekutivu PCIC nian, Vicente Fernandes dehan, ekipamentu ne’e ho naran I24-7 Communication System, ne’e uza hodi halo komunikasaun entre membru Interpol hamutuk na’in 194 hodi fasilita Polísia Intenasional sira inkliu Timor-Leste kona-ba mandatu kapturasaun internasionál sira.
“Liuhusi ekipamentu ne’ebé ita iha, bele fasilita ita hodi halo komunikasaun ho membru Interpol sira mak namkari iha mundu,” nia dehan.
Nia dehan, Timor-Leste hanesan membru Interpol dezde 2002, no ekipamentu ida-ne’e importante tebes, liu-liu ba servisu Interpol nian hodi fasilita polísia, tanba Interpol ne’e iha estrutura PCIC nian.
“Ba oin ita bele asesu ona ba mandatu kapturasaun internasionál sira liuhusi ekipamentu I24-7 Communication System hodi komunika ho Interpol,” Diretór Fernandes dehan.
Nia dehan, ekipamentu ne’e hodi komunika ba krime transnasionál sira hanesan tráfiku humanu no seluk tan, bainhira tau iha ekipamentu I24-7 Communication System, PCIC mós bele asesu.
Tanba ne’e agradese tebes ba parseru China nian, tanba bele apoiu ona ekipamentu refere ba PCIC.
Iha fatin hanesan, Embaixadór China iha Timor-Leste, Xiao Jianguo dehan, governu China sempre apoiu dezenvolvimentu juridisiál sira iha Timor-Leste, liu-liu iha servisu Polísia Internasionál (INTERPOL) nian.
“Ohin ita oferese ekipamentu I24-7 Communication System ba PCIC hodi implementa servisu INTEPOL nian iha Timor-Leste,” nia hatete.
Nia dehan, governu China la apoiu de’it ekipamentu refere, maibé antes ne’e apoiu mós ekipamentu DNA, fasilita membru PCIC nain lima bá tuir formasaun kona-ba lei polísia internasionál nian, nune’e mós utilizasaun ekipamentu I24-7 hodi asesu ba informasaun.