- Publika iha: 01 Agosto 2023
Polísia Nasional Timor-Leste PNTL liuhusi komandu polísia Munisipiu Díli kaptura ona autór na’in 9 ne'e mak komete krime na’ok telefone no pasta iha kapital Díli iha tempu kalan.
Komandante Polísia Munisípiu Díli Superientendente Xefe Orlando Gomes dehan, autór hirak ne'e kaptura husi ekipa Unidade Intelejénsia iha área Díli laran.
"Autór na’in sia ne’ebé ita kaptura ne'e ita submete ona ba sela detensaun hodi halo prosesu investigasaun," nia dehan.
Nia dehan, autór na’in 9 ne’ebé mak polísia kaptura ne'e, mak sempre naok ema nia telefone, bainhira halo movimentu ho motorizada iha dalan públiku sira iha tempu kalan.
"Durante ne’e iha ona vítima na’in 8 mak mai hato'o keisa iha polísia, liuhusi keisa ne'e mak iha halo indentifikasaun ba autór hirak ne'e no ita kaptura," Komandante Gomes dehan iha Kaikoli, Díli.
Nia dehan, aleinde halo kapturasaun ba autór na’in 9 ne'e prende mós evidénsia hanesan motorizada hamutuk 5, no telefone 5 no evidénsia hirak ne'e asegura ona iha Komandu Polísia Munisipiu Díli.
“Ita sei la tuur nonook, sei kontinua intensifika liutan hodi halo planu operasaun, iha tempu kalan liuhosi la’o ain, tama sai bairru risku sira iha Díli laran, atu nune’e prevene asaun krimi sira hanesan ne'e,” nia informa.
Enkuantu nia dehan, dadaun ne'e unidade intelijénsia kontinua buka tuir, hodi indentifika autór sira seluk ne’ebé komete krimi sira hanesan ne’e, tanba tuir prosesu investigasaun ne’ebé Komandu PNTL halo ne’e sei iha tan autór sira seluk ne’ebé envolve kazu hanesan.
Entretantu, komunidade Imaculada Gorrete dehan hahalok ne’ebé mak halo husi joven grupu balun ne’ebé mak halo movimentu hodi naok ema nia sasan iha dalan públiku ne'e mal-edukadu.
"Maibé agradese ba parte seguransa, tanba halo ona servisu ho di’ak hodi kaptura naok-teen sira-ne'e," nia dehan.
Alende ne'e mós husu ba inan-aman sira atu kontrola oan sira hodi hadook a’an husi hahalok naok-teen.