- Publika iha: 02 Setembro 2023
Polisia Nasional Timor-Leste (PNTL), liu husi Seksaun Tranzitu Seguransa Rodaviaria Nasional, durante fulan janeiru to'o agustu 2023 rekolla reseitas hamutuk $88,000 resin husi entrada fronteira tolu, Salele, Batugade no Wini Sakato.
Komandante Tranzitu, Superientendente Asistente Luis da Costa dehan reseitas ne'ebe mak rekolla ne'e husi tipu rua, mak hanesan infrasaun no taxa husi kareta sira ne'ebe tama no sai husi fronteira.
"Tanba ne'e ami mos husu atu governu bele kria kondisaun diak liu-liu ba postu tranzitu sira iha fronteira atu bele fasilita ita nia membru sira halo servisu hodi kuntribui reseitas ba kofre estadu," Komandante Costa dehan.
Nia dehan, reseitas refere ne'ebe mak sira rekolla ne'e hatama kedan ba kofre estadu hodi jere ba dezenvolvimentu iha rai laran.
Nia dehan, dadaun ne'e membru sira nafatin deskata iha pontu entrada sira hodi hala'o sira nia knar tuir ordem ho kondisaun saida deit mak iha postu.
Entertantu, Ministru Ministério Interior, Fransisco Guterres, dehan atu responde fasilidade no hadia infraestrutura ba polisia hahu husi nasional to'o postu, ne'e iha ona planu fixu no tau ona iha orsamentu.
"Maibe ita sei rezolve ida por ida, labele serentak deit tanba nia rezultadu sei la pozitivu, tanba ne'e mak ita identifika ona atu rezolve uluk lei estatutu organiku PNTL nian mak tama ba ekipamentu no infraestrutura," nia dehan.
Tanba ne'e nia dehan, konaba kontrusaun postu iha fronteira nono governu kuntinua deit servisu ne'ebe mak antes ne'e governu anterior husik hela no dadaun ne'e kontrusaun ba postu balun sei lao hela no seidauk finaliza.