Membru F-FDTL Na’in 30 Partisipa Ezersísiu PREDATOR RUN 23 iha Darwin

Membru Falintil Forsa Defesa Timor-Leste (F-FDTL) na’in 30 reprezenta Forsa Armada partisipa ezersísiu PREDATOR RUN 23 iha Darwin, Australia.

Portavós Komandu F-FDTL, Kapitaun Mar no Guerra João da Silva hatete, ezersísiu ne'e kombinasaun no naran PREDATOR RUN 23 ne'ebe partisipa husi nasaun forsa armada husi nasaun Asia Pasifiku nian.

"Ezersísiu ne'e realiza iha tinan ida ne'e ba dala 23 ona, no Forsa Armada Timor Leste foin primeiru ves. Sira na’in 30 reprezenta Timor-Leste hodi partisipa," nia dehan.

Nia dehan, membru na’in 30 ne’ebé partisipa ne'e husi Komponente Terestre, sira na’in hirak ne'e treinadu mak ba partisipa ho durasaun fulan ida.

"Partisipa ezersísiu ne'e hatudu ba mundu katak Timor-Leste mós iha ona forsa armada ne’ebé mak komesa avansadu ona," Portavóz Silva dehan iha Fatuhada.

Alende ne'e nia dehan, iha ezersísiu PREDATOR RUN 23 ne'e mós akontese insidente ida ne’ebé mak rezulta membru F-FDTL na’in tolu, ida kanek kaman no rua grave.

"Maibé ita simu ona informasaun katak hetan ona tratamentu husi ospital militár nian, iha Darwin no dadaun ne'e membru na’in tolu ne'e kondisaun di’ak ona," nia informa.

Entretantu, antes ne'e, membru partisipante, Gaudencio Gracia Pereira dehan partisipa iha ezersísiu ne'e sei kumpri regulamentu atu bele partisipa ho rezultadu di’ak.

"Ami hala'o servisu tuir orden no profesionalizmu tuir misaun ne’ebé iha ami nafatin firme," nia salienta.

Nia dehan iha ezersísiu ne'e mak dezastre ruma akontese ne'e normál, tanba vida militar konsekuénsia saida de’it prontu simu hodi serbí povu no nasaun.