- Publika iha: 15 Setembro 2023
Polísia Tránzitu Seguransa Rodaviária Nasionál aplika multa infrasaun ba viatura estadu 12 nian, kompostu husi karreta estadu lima (5) no motorizada estadu hitu (7), tanba identifikadu utiliza ba atividade privadu iha finde-semana.
Komandante Polísia Tránzitu Seguransa Rodoviária Nasionál Superientendente Asistente Luis da Costa dehan, liga ba lamentasaun husi públiku nian katak polísia tránzitu ne'e halo ceck poin ba de’it transporte privadu no públiku maibé ba karreta no motorizada estadu la iha.
Tanba ne'e mak iha semana kotu ne'e polísia tránzitu reativa fali despaxu operasaun konjunta ne’ebé mak governu implementa hodi bele halo operasaun espesífiku ba utilizasaun motorizada no karreta estadu.
"Ita reativa fali despaxu operasaun konjunta ne'e hodi realiza atividade operasaun espesífiku ba utilizasaun motorizada no karreta estadu iha finde-semana iha kapitál Díli.
Ita konsegue identifika no prende viatura estadu hamutuk 12 kompostu husi karreta lima (5) no motorizada estadu hitu (7) ne’ebé utiliza fora husi oras servisu ba atividade privadu," Komandante Costa dehan iha knaar fatin Kaikoli.
Nia dehan, veikulu estadu nian ne’ebé polísia prende ne'e asegura hela iha komandu no aplika multa infrasaun ba motorista sira hodi ba selu iha banku mak bele entrega karreta ba ministériu no sei la entrega direita maibé tenke liuhusi diresaun patrimóniu estadu.
"Viatura estadu 12 ne’ebé mak ita prende ne'e kareta lima ne'e mai husi Ministériu Saude ida, Ministériu Obras Publika ida, Estatal ida, Justisa ida no husi parte Centru Nasional Longistiku ida nune'e mos motor 7 ne'e husi Ministériu Agricultura no Peskas rua no Estatal 5," nia informa.
Nia dehan, karreta no motorizada hirak ne'e kontinua halo prosesu, tanba identifika no halo sirkulasaun fora husi oras servisu sem karta orden servisu.
Entretantu, Diretór Ezekutivu Fundasaun Mahein Nelson Belo dehan, motorista transporte estadu sira ne’ebé uza patrimóniu estadu fora husi oras servisu sem karta autorizasun ne'e tenke prosesu.
"Patrimóniu estadu sira autoriza de’it iha oras servisu, la'ós uza fali tula família ba pasiar, ka ba munisípiu no festa ida ne'e lei la autoriza, bainhira fin-de-semana karreta no motorizada estadu nian tenke halo estasionamentu iha edifísiu labele lori ba. Ita apoiu polísia atu bele kontinua operasaun espesífiku ba movimentu viatura estadu iha finde-semana," nia dehan.
Nia dehan, operasaun espesífiku ne'e tenke kontinua, tanba iha funsionáriu públika balun utiliza patrióniu estadu ba asuntu privadu atu bele kumpri regulamentu ne’ebé fó sai ona.