- Publika iha: 19 Setembro 2023
Falintil Forsa Defesa Timor-Leste (F-FDTL), liuhusi Unidade Polísia Militár (PM), iha ona Batedór na’in 6 ne’ebé durante ne'e utiliza motorizada hodi halo atrasaun iha eventu nasionál militár nian.
Komandante PM, Major Abel Amaral Niki, dehan tuir loloos ne'e espesialista batedór ne'e tenke pelotaun ida, maibé iha PM na’in neen (6) ne'e minus liu, tanba ne'e esforsu hela hodi bele aumenta.
"Durante ne'e ita iha de’it membru batedór na’in 6 ne’ebé pasa iha formasaun iha tinan 2010 husi membru na’in 13 ne’ebé mak partisipa," nia dehan iha Kintal Boot, Díli.
Nia dehan, membru na’in 6 ne’ebé pasa iha formasaun iha tinan 2010 ne'e mak durante ne'e utiliza motorizada batedórnian ne’ebé oferese husi parseiru sira.
"Dadaun ne'e ita esforsu makas liuhusi kooperasaun ho parseru husi Militár Brazil nian, hodi oferese formasaun Batedór ba membru hamutuk na’in 13," Komandante Niki informa.
Nia dehan, membru na’in 13 ne’ebé mak partisipa formasaun batedór husi Militár Brazil ne'e, sira hotu tenke liu fali husi teste, banhira pasa iha teste mak bele sai loloos membru unidade Batedór.
Aleinde ne'e nia dehan, Militár Brazil mós sei apoiu formasaun intelijénsia ba membru Polísia Militár sira iha tempu besik.
Entretantu, Reprezentante Embaxadór Brazil, Rita de Cássia Lott Marques, dehan, kooperasaun entre Militár Brazil ho Militár Timor-Leste ne'e komesa iha tinan 2005 to'o ohin loron.
"Iha kooperasaun ne'e ita haree liuba formasaun kapasitasaun ba área hirak ne’ebé ho nesesidade ba dezenvolvimentu profisionál membru sira-nian," nia dehan.
Tanba ne'e nia dehan, dadaun ne'e Militár Brazil fó hela formasaun profisionál kona-ba batedór nian ba membru na’in 13.