- Publika iha: 27 Outubro 2023
Unidade Espesial Polísia (UEP) iha ona ekipamentu destruisaun Bom, hodi fasilita servisu operasional iha Explosive Ordnance Disposal (EOD) hodi responde ba situasaun ne’ebé fó perigu ba ema nia vida no instalasaun estadu nian.
Komandante UEP, Superintendente Damião Correia dehan, ekipamentu destruisaun bom ne'e oferese husi Governu Australia liuhusi Timor-Leste Police Development Program (TLPDP) hodi fasilita servisu iha Seksaun EOD nian.
Nia dehan, ekipamentu ne'e espesiál tebes hodi fasilita servisu Seksaun EOD, ba relasionál ho amiasa esplozivu no improvizadu nomós konvensionál iha teritóriu laran.
"Agradese tebes ba Governu Australia liuhusi Timor-Leste Police Development program TLPDP ne’ebé mak oferese ona ekipamentu destruisaun bom ne'e UEP hodi reforsa ami-nia servisu operasionál," Komandate UEP Corea dehan.
Tanba ne'e, lori Komandu UEP nia naran hato'o argadase wain ba TLPDP ne’ebé apoiu ona ekipamentu espesífiku ne'e.
"Durante ne'e ita la iha ekipamentu hanesan ne'e maibé ohin ba oin Unidade Espesial Polísia UEP iha ona ekipamentu espesífiku ne'e," nia salienta iha Kuartel UEP Bairu-pite.
Iha fatin hanesan, Reprezenta Embaixadór Australia iha Timor-Leste Enkaregada Caitlin dehan, ekipamentu refere hodi hasa'e UEP sira-nia tékniku seguransa.
"Ekipamentu ne'e bele uza hodi identifika no halo distruisaun ba bom no sasan seluk ne’ebé perigu ba ema nia vida," nia dehan.
Enkuantu ekipamentu ne'e bele utiliza hodi halo monitorizasaun ba objetu sira ne’ebé iha kondisaun perigu sira.
"Ekipamentu ne'e kompleta ho kamera no liña komunikasaun, hodi fó solusaun ba servisu Explosive Ordnance Disposal (EOD) nian," nia dehan.
Nia dehan, alende apoiu ekipamentu destruisaun ne'e TLPDP mós halo kedan formasaun ba membru sirakona-ba utilizasaun ekipamentu ne'e, aleinde ne’e apoiu orsamentu ba UEP.