Segunda, Junho 24, 2024
Total visitors: 766366

Komandu Falintil-Forsa Defesa Timor-Leste (F-FDTL) promove membru na’in 119 husi Soldadu ba Kabu hafoin remata sira-nia formasaun durante semana 7, iha sentru Instrusaun Komandante Nicolau Lobato Metinaro, Díli.

Komandu Falintil-Forsa Defesa Timor-Leste (F-FDTL) promove membru na’in 119 husi Soldadu ba Kabu hafoin remata sira-nia formasaun durante semana 7.

Komandante Kompañia, Tenente Francelino Soares Belo, hatete membru hirak ne’ebé promove ba Kabu, ba oin sira bele ona sai komandante Esquadra sira F-FDTL nian, tanba durante kursu ne'e sira aprende ona área oin-oin kona-ba lideransa.

"Ohin ofisialmente ita promove membru na’in 119 husi Soldadu ba Kabu hodi bele koloka sai Komandante Esquadra," Komandante Kompañia Tenente Soares dehan.

Nia dehan, membru Kabu na’in hirak ne'e hetan prestasaun ho valor pozitivu no passa, tanba hatudu duni sira-nia vontade aprende dedikasaun tomak ba kursu durante semana 7 nia laran.

"Formasaun ne’ebé ita-nia membru sira hetan mak funsaun kombate Esquadra, no lei servisu militár, formasaun tékniku, no táktika ne’ebé sira aprende no prátika durante ne'e," nia informa.

Tanba ne'e nia husu ba membru Kabu na’in 119 ne'e, bainhira komandu fó konfiansa hodi lidera esquadra sira tenke servisu ho disiplina no tuir orden militár nian no tenke iha responsabilidade.

Iha fatin hanesan komandante Forsa Apoiu Jeral Coronel Cesario Salustiano Marçal Ximenes "Haksolok" hatete, soldadu sira ne’ebé ramata sira-nia kursu hodi promove ba Kabo, husu nafatin sira-nia tulun atu apoiu sira-nia lideransa, nune'e sira-nia knaar ne’ebé sira assume sente responsabilidade duni ba sira.

"Ida-ne'e responsabelidade ba imi atu nune'e imi atu bele kontinua halo imi-nia knar, tanba bainhira hetan ona promosaun knaar mós aumenta, tanba ne’e tenke responsabilidade ba diviza ne’ebé komandu oferese," nia dehan.

Tanba ne'e la haluhan hato'o parabéns bom-susesu ba membru promovidu na’in 119 ne’ebé mak esforsu durante tinan barak nia laran no bele hetan ona títulu foun husi Komandu F-FDTL.