- Publika iha: 17 Outubro 2024
Membru Unidade Polísia Marítima (UPM) na’in-neen (6) ba hala'o estudu kona-ba Ró iha Politeknik Perkapalan iha Surabaya.
Komandate Jerál Polísia Nasionál Timor-Leste (PNTL) Komisáriu Henrique da Costa dehan, membru na’in-6 ne’e ba foti espesífiku kona-ba ró nian mak hanesan, teknika eletrisista, makinista no kona-ba manejamentu ba ró nian.
"Área espesífiku tolu ne'e importante tebes hodi halo dezenvolvimentu iha Unidade Polísia Marítima (UPM), tanba ne'e ita haruka membru na’in-6 ne’e ba eskola iha Politeknik Perkapalan Surabaya Indonézia," Informa.
Nia dehan, membru hirak ne'e sei hala'o estudu durante tinan 4 no fila mai nafatin koloka sira iha Unidade Polísia Marítima.
"Sira ba estuda kona-ba Marítima nian no sira mai tenke tau sira iha UPM hodi halo dezenvolvimentu," Komisáriu Costa dehan iha UPM, Díli.
Nia hatete, programa ne'e foin mak hahú no sei kontinua hodi fó oportunidade ba membru sira seluk hodi ba hala'o estudu iha rai liur hodi kompleta prioridade lima iha instituisaun PNTL epesialmente ba dezenvolvimentu rekursu umanu nian.
Entretantu Komandante UPM Superintendente Eugenio Pereira dehan, Unidade Polísia Marítima hetan oportunidade hodi responde ba kapasidade no dezenvolvementu rekursu umanu nian.
"Ita haruka ita-nia membru na’in-6 hodi ba hala'o estudu iha Indonézia liu-liu kona-ba área ró nian," nia salienta.
Nia dehan, ho área espesifiku ne’ebé mak sira foti ne'e, depois de remata sira sei mai priense iha área operasaun naviu nian iha maritima, tanba ne'e fiar katak futuru sira sei nai ho kapasidade ne’ebé di’ak hodi dezenvolve Unidade Polísia Marítima.