- Publika iha: 17 Outubro 2024
Postu Unidade Polísia Marítima (UPM) rua hanesan, Oecusse no Suai la iha ró hodi apoiu servisu patrollamentu nian hodi kontrolu atividade ilegal iha tasi.
Komandante Unidade Polísia Marítima (UPM) Superintendente Eugenio Pereira dehan, postu rua-ne'e seidauk koloka ró, tanba la to'o, no durante ne'e membru sira ne’ebé destaka iha postu rua-ne'e halo servisu kontrolu iha tasi ibun de’it.
Nia dehan, postu sira seluk hanesan, Díli, Atauro, Lospalos, Liquiçá no seluk tan koloka hotu ona ró no membru sira utilize ona hodi kontrolu atividade ilegal iha tasi, maibé iha postu rua mak seidauk.
"Postu rua ne’ebé la iha ró patrollamentu hodi apoiu servisu kontrolu hanesan, Oecusse no Suai, durante ne'e sira kontrolu iha tasi ibun deit no la tama ba tasi laran," nia dehan.
Nia dehan, dala ruma sira hetan atividade peskailegal no movimentu ilegal husi tasi, maibé sira labele halo intervensaun, tanba ró la iha.
Maibé nia dehan, Unidade Polísia Marítima maske hasoru difikuldade hanesan ró patrollamentu, maibé nafatin servisu no utilize meiu oi-oin hodi halo servisu prevensaun ba atividade illegal iha tasi.
Nia dehan, kona-ba rekursu umanu natoon hodi halo servisu prevensaun iha tasi, tanba dadaun ne'e membru hamutuk 340.
Entretantu Komandate Jerál Polísia Nasionál Timor-Leste (PNTL) Komisáriu Henrique da Costa dehan, loos duni katak postu UPM rua mak seidauk koloka ró, tanba la to'o.
Tanba ne'e nia dehan, komandu sei tau iha planu atu nune'e iha tinan oin bele kompra tan spillbud baluk atu bele koloka iha postu sira.
"Komandu ne’ebé apoiu husi Governu nafatin buka meiu oinsa atu kompleta ekipamentu sira ne’ebé Unidade Polísia Marítima UPM persiza epesialmente ró," Komisáriu Costa saliente.
Enkuantu nia dehan, dadaun ne'e komandu halo ona manutensaun ba ró Lucitanya, hodi bele koloka iha postu rua ne’ebé seidauk iha ró patrollamentu ne'e.