- Publika iha: 24 Outubro 2024
Diretór Ezekutivu Fundasaun Mahein Nelson Belo dehan, tempu to’o ona atu moderniza Instituisaun F-FDTL, hodi lori dezenvolvimentu ba militár sira, liuliu rekursus umanu, infraestrutura, ekipamentu importante sira hotu hodi fasilita militár sira-nia servisu.
Nia dehan, Instituisaun F-FDTL presiza ema ne’ebé adapta ho lei sira kona-ba modernizasaun, ema lideransa komandu no instituisional, iha era modernu nian.
"Atu Moderniza Falintil Forsa Defesa Timor-Leste, presiza veteran sira fó konfiansa ba militár jerasaun foun sira hodi lidera Instituisaun Militár ne’e," niain forma.
Tanba ne'e nia dehan, atu halo mudansa presiza ema ne’ebé mai ho méritu kona-ba regra Nasionál no Internasionál no lei sira ne’ebé iha.
"Ita fiar katak ita-nia katuas sira fó fiar ona ba militár jerasaun foun," Diretór Ezekutivu FM Belo dehan.
Enkuantu nia dehan, durante ezisténsia F-FDTL nia dezenvolvimentu seidauk la’o di’ak iha area oi-oin.
"Asuntu infraestrutura ita presiza halo dezenvolvimentu, ita presiza sosa ró hodi halo patrollamentu iha tasi, fó treinamentu ba ekipamentu modernu nian la’ós ba asuntu funu nian de’it, maibé militár prontu para halo intervensaun ba asuntu dezastre no asuntu sira seluk ne’ebé nesesidade ba apoiu sosiál nian," nia dehan.
Tanba ne’e nia dehan, militár tenke prontu ho apoiu saida de’it mak tuir nesesidade povu no nasaun nian.
Entretantu Xefe Estado Maior Jeral F-FDTL Tenente Jenerál Domingos Raul Falur Rate Laek dehan, militár jerasaun foun barak mak komandu haruka ona ba eskola lideransa maijor iha rai-liur nune'e hodi prepara ba lidera Instituisaun F-FDTL.
"Loos katak tempu to'o instituisaun Falintil Forsa Defesa Timor-Leste entrega ba militár jerasaun foun sira lidera no ami presiza ba reforma hodi fó tempu ba ami-nia família," nia dehan.
Tanba ne'e nia informa, Komandu akompaña lai militár jerasaun foun sira fó ideia ba sira forma sira no aban bainrua sira lidera mós buat hotu la’o di’ak.