Governu Xina Apoiu Konstrui Ospitál Militár

Governu Xina apoiu Ministériu Defesa no Falintil-Forsa Defeza Timor-Leste (F-FDTL) hodi konstrui ospitál militár iha Timor-Leste.

Adjuntu Xefe Kooperasaun Internasionál husi Ministériu Defeza Xina nian Majór Jenerál, Zhang Baoqun dehan, servisu kooperasaun entre Timor-Leste ho Xina kelur ona ho sei hametin liutan iha futuru.

"Ita kompermetidu apoiu Falintil Forsa Defesa Timor-Leste (F-FDTL) iha área saida de’it no ita apoiu konstrui ospitál militár iha Timor-Leste," nia saliente.

Ministru Defeza, Donaciano Costa Gomes Pedro ‘Klamar Fuik’ hatete, governu Xina konfirma ona apoiu Ministériu Defesa no F-FDTL liu-liu iha projetu konstrusaun ospitál militár iha Timor-Leste.

"Ita-nia parseiru governu Xina prontu apoiu konstrui óspitál militár, tanba iha VIII Governu Konstitusionál, hato’o ona sira-nia protidaun hodi fó apoiu ba Timor-Leste liuhusi tulun Ministériu Defeza no F-FDTL konstrui ospitál militár," Ministru Defesa Klamar Fuik dehan.

Nia informa, iha ámbitu ida-ne’e xefe delegasaun atu intensifika tan área kooperasaun ne’ebé governu Timor-Leste halo ona, liu-liu iha dominiu defeza atu haree oinsá atu konstrui ospitál militár ida ne’ebé sei konstrui andar ualu ho kapasidade bele simu pasiente atus ida bele hela iha laran.

Tanba ne'e Nonu Governu Konstitusionál iha programa ida hodi harii ospitál militár iha tinan ida ne’e ho Governu Xina nia apoiu no governu Timor-Leste hatudu ona fatin hodi konstrui ospitál militár.

“Fatin ba konstrusaun ospitál militár mak edifísiu Ministériu Defeza no Kuartel Jenerál F-FDTL nia kotuk no rai ba konstrusaun hamutuk ektare ida resin ho media metru 10 kuadradu," nia informa.

Nia dehan, ospitál militár ne’e sei serve ba militár no polísia nune’e mós ba veteranu sira inklui mós ba públiku em jerál.

Alende ne’e kooperasaun entre Timor-Leste ho Xina iha setór oin-oin ho nune’e haree mós parte kooperasaun ba iha área Defeza ne’ebé Xina halo ho Timor-Leste, desde tempu mais difisil hahú iha 1975 -1999 to'o iha restaurasaun independénsia iha 2002 sira komesa fó apoiu ba Timor-Leste.