PN: Presiza Aumenta Membru Polísia Iha Suku

Parlamentu Nasionál husu Komandu Polísia Nasionál Timor-Leste (PNTL) aumenta membru Polísia kada suku hodi halo prevensaun ba konflitu komunitáriu.

Deputada Maria Teresa Gusmão dehan, Polísia nia servisu iha terenu durante ne'e di'ak tebes, maibé presiza dezenvolve kultura servisu koletivu liu-liu atu no halo prevensaun ba konflitu iha komunidade.

"Presiza aumenta membru Polísia kada suku hodi promove servisu koletivu ba prevensaun konflitu komunitáriu sira," nia hatete.

Nia dehan, aumenta membru Polísia kada suku nune'e mos fasilita formasaun kapasitasaun, kona-ba mekanizmu medida prevensaun nian.

"Konflitu sira-ne’ebé mak sempre akontese iha komunidade, ne'e tanba falta Polísia iha suku, tanba ne’e tenke aumenta membru Polísia kada suku," nia salienta.

Nia hatete, alende aumenta membru Polísia iha suku tenke kria mós kondisaun ba sira hodi bele fasilita sira-nia servisu prevensaun konflitu komunitáriu.

Entretantu Komandante Jerál Polísia Nasionál Timor-Leste (PNTL) Henrique da Costa dehan, loos duni katak, Ofisiál Polísia Suku (OPS) ne’ebé menus, tanba kada suku pesoál ida de’it.

"Ita membru ida de'it mak kobre iha suku ida, iha suku balun ne’ebé mak área jurídiku luan tebes, tanba ne'e presiza duni aumenta," nia hatete.

Nia dehan, iha rekrutamentu ba membru foun Polísia Nasionál Timor-Leste (PNTL) fó mós impotansia ba aumenta Ofisiál Polísia Suku (OPS).