- Publika iha: 20 Dezembro 2024
Komandu Jerál Polísia Nasionál Timor-Leste (PNTL) lansa operasaun hodi kontrolu negosiante no vendedór figetis ligadu ho selebrasaun loron Natal Tinan Foun iha teritóriu laran.

Komandante Jerál PNTL Komisáriu Henrique da Costa dehan, komandu orienta ona membru sira iha munisípiu hotu halo operasaun hodi kontrola figetis, tanba tama ona fulan dezembru ne'e ema komesa faan, sosa no utiliza arbiru de'it.
"Ita lansa operasaun hodi kontrolu utilizasaun figetis no faan iha territóriu laran, tanba ne'e iha konsidera krime kontra bandu," nia dehan.
Nia dehan, Polísia la tolera ema sira ne’ebé faan figetis atribu sem hetan lisensa, no ema sira ne’ebé utiliza arbiru sira.
"Bainhira ita-nia mémbru sira hetan ita sei prosesu tuir lei," Komisáriu Costa dehan.
Nia dehan, tanbá ne'e husu ba negosiante sira hakarak halo negosia faan sasan sira ne’e mak lei fo dalan labele faan sasan ne’ebé lei bandu.
"Ita mós orienta ona Unidade Patrollamentu Fronteira (UPF) hodi halo kontrolu másimu sasan tama no sai iha fronteira," nia informa.
Entretantu Komandante UPF Superintendente Euclides Belo dehan, ekipa halo ona operasaun cek poin iha fronteira, tanba komunidade sira sempre halo atividade kontra bandu, ba figetis, no sigaru, sira sempre halo meiu oi-oin atu atravesa.
"Ita haree balun koko atravesa husi tasi, balun husi rai maran, no fugetis sira ne’ebé sut 1 ka 2 ne'e sempre subar iha roda nia janti, to'o fatin destinasaun mak sira foin sobu," nia hatete.
Nia dehan, tuir informasaun ne'ebé sira hetan liuhusi aprensaun ba kareta ida no kore roda nia janti hodi prende figetis no sigaru ne'ebé mak subar iha janti.
"Evidensia hirak ne'e ami asegura hela iha kuartel Unidade Patrollamentu Frontéira (UPF) no fim do mes Novembru mak intrega mai investigasaun nasionál hodi kontinua prosesu ba Ministériu Públiku," Komandate UPF Superintendente Belo informa iha CFP.
Nia dehan, Unidade Patrollamentu Fronteira (UPF) koopera ho Komandu Polísia munisípiu tolu (3) hanesan, Bobonaro, Covalima, no Oecusse nafatin halo vizilánsia koordena mós ho Tentara Nasionál Indonézia (TNI) hod garante seguransa iha fronteira.