- Publika iha: 20 Dezembro 2024
Polísia Nasionál Timor-Leste (PNTL) deteta ona grupu balun halo rekrutamentu ilegál ba Timor-oan sira liuhusi média sosiál Facebook hodi ba servísu iha estranjeiru.

Xefe Departamentu Investigasaun Kriminál Nasionál (DIKN) Superintendente João Belo dos Reis dehan, rekrutamentu ne'ebé dadaun ne'e grupu balun halo liuhusi facebook ne'e ilegál, grupu hirak halo hodi hetan osan husi vítima sira nune'e mós sai tarjetu ba tráfiku umanu.
"Ita deteta ona katak, rekrutamentu hirak ne'e ilegál, sira ne’ebé lansa informasaun husi grupu balun liuhusi Facebook," nia informa.
Nia dehan, grupu hirak ne'e balun iha Timor-Leste, balun iha Indonézia no balun iha nasaun seluk ne’ebé servísu hamutuk hodi lansa rekrutamentu ilegál ba Timor-oan sira.
"Ita identifika iha Timor- oan balun mak sai ona vítima, no dadaun ne'e joven balun komesa priense ona formatu ne'ebé mak grupu hirak ne'e lansa iha média sosiál Facebook," Xefe DIKN Superintendente Reis dehan.
Nia dehan, ID hirak ne'ebé mak utiliza hodi halo rekrutamentu ne'e mós identifika ona katak ID falsu.
"Ita mós ba konfirma ona iha Embaxada sira iha Timor-Leste mós dehan sira la iha rekrutamentu kona-ba traballadór Timor-oan atu ba servísu iha sira-nia nasaun," nia hatete.
Nia dehan, tanba ne'e husu ba inan, mana, no maluk joven sira, iha Timor-Leste, atu labele priense arbiru formatu ne'ebé lansa iha facebook, tanba ne'e identifika ona katak ilegál no indika ba iha husu osan ba vítima sira no ida seluk ba tráfiku umanu.
Entretantu Deputadu Antonio Verdial de Sousa dehan, rekrutamentu ilegál husi grupu deskoñesidu hodi bosok joven sira atu monu ba hahalok tráfiku umanu nian.
Nia dehan, orgullu ho servísu polísia nian ne’ebé mak deteka lalais grupu hirak ne'ebé mak lansa informa falsu ne'e hodi bosok joven Timor-oan sira.
"Ita husu ba parte polísia atu akompaña nafatin ba sira ne'ebé sai ona vítima ba rekrutamentu ilegál ne’e, no kontinua husu polísia atu hola nia pozisaun hodi informa ba públiku atu hado'ok an husi rekrutamentu ilegál ne'ebé ema halo liuhusi facebook," nia dehan.
Nia dehan, durante ne'e akompaña ona iha Timor-oan barak mak sai ona vítima ba rekrutamentu ilegál ne’e, balun ba deve tun sa'e ema nia osan dehan hodi trata dokumentu sira no sosa tiket, osan ne'ebé sira deve ne'e ho montante ne’ebé bo'ot tebes, ikus la ba tanba ema bosok de'it oinsa atu selu ema nia deve sira no sira ne’ebé ba maibé servísu ema la selu, tanba ne'e husu atu kontrola situasaun hirak ne'e.