- Publika iha: 20 Dezembro 2024
Komandu Polísia Nasionál Timor-Leste (PNTL) no Falintil Forsa Defesa Timor-Leste (F-FDTL) hasai ona diretiva operasional hodi halo prevensaun krime iha selebrasaun loron Natal no Tinan Foun.

Komandante Jerál PNTL Komisáriu Henrique da Costa dehan, liuhusi diretiva ne'ebé asina husi Komandu FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) no distribui ba Komandu Munisípiu sira oinsa no koopera ho forsa sira hodi halo servísu prevensaun krimé ba Natal no Tinan Foun.
"Ita hasai ona diretiva operasional konjunta hodi alerta ba membru PNTL no F-FDTL hodi halo medida prevensaun krime atu ema hotu bele selebra loron bo'ot Natal Tinan Foun ho paz estabilidade," nia dehan.
Nia dehan, sevísu operasaun konjuta ne'ebé sei realiza husi forsa rua ne'e bazeia ba domementu ne'ebé asina ona husi komandu rua.
"Forsa rua ne'e sei halo servísu prevensaun durante 24 oras hodi asegura movimentu komunidade nian hodi ba misa selebrasaun loron Natal no Tinan Foun nian husi nasionál ho baze," nia salienta.
Nia dehan, forsa rua ne'e sei la tolera ema se de'it mak hakarak kria konflitu iha loron natal tinan foun, polísia sei foti medida rigorozu ba autor sira.
Prezidente Komisaun B Trata Asuntu Defeza no Seguransa iha Parlamentu Nasionál Domingos Augusto "Deker” dehan, selebrasaun loron Natal no Tinan Foun ne'e ema hotu tenke moris iha paz estabilidade la'os kria konflitu.
"Natal tinan foun ne'e komunidade hotu hakarak movimentu lìvre no lakohi hetan intervensaun husi grupu ka parte balun ne’ebé mak hakarak halakon ema nia liberdade," nia dehan.
Nia dehan, liuhusi operasaun konjunta Polísia Nasionál Timor-Leste (PNTL) no Falintil Forsa Defesa Timor-Leste (F-FDTL) realiza ne'e bele garante seguransa ne'ebé seguru ba komunidade sira iha territóriu laran relasiona ho loron Natal no Tinan Foun.