Quarta, Fevereiro 19, 2025

Komandante Forsa Navál Lizeíra Comodoro Higino das Neves husu governu liuhusi Ministériu Defeza atu reforsa Komponente Navál entermos fasilidade no kapasidade hodi bele fasilita sira hala'o misaun iha tasi-laran ho di'ak.

Komandante Forsa Navál Lizeíra Comodoro Higino das Neves husu governu liuhusi Ministériu Defeza atu reforsa Komponente Navál entermos fasilidade no kapasidade hodi bele fasilita sira hala'o misaun iha tasi-laran ho di'ak.

Nia dehan, hala'o misaun iha tasi importante tebes, hodi assegura rikusoin Timor nian iha tasi laran husi peska ilegal nune'e mós kontrolu tranzasaun ilegal husi tasi.

"Iha komemorasaun aniversáriu Komponente Navál ba dala XXIII ne'e ha'u husu ho esperasa boot ba governu liuhusi Ministériu Defesa atu reforsa Komponente Navál entermos de fasilidade, no kapasidade hodi apoiu sira-nia misaun iha tasi-laran," nia hatete iha Navál Hera, Díli.

Nia dehan, Komponente Navál iha misaun rua ne'ebé importante mak funsionamentu Autoridade Marítima Nasionál no Komponente Navál ne'e rasik.

"Ita fiar katak, ho Ministru Defesa ninia lideransa, sei book, ajuda komponente navál, buka meiu, fasilidade para bele hakbi'it komponente navál ninia kapasidade, hodi bele hala’o sira-nia misaun iha tasi-laran," Komandante Komponente Navál Comodoro Neves hatete.

Atende ne'e nia dehan, fiar katak, tinan ida-ne’e governu bele instala ona, koloka ona Kapitaun Portu Tibar, maka Komponente Navál sei bele halo ninia atividade ho di’ak.

"Ami prontu ona, atu halo ami-nia kna’ar, preparasaun rekursus umanus ami prepara ona lubuk ida, la’ós 100%, mais 75% está preparadu para hala’o ami-nia kna’ar,” informa Comodoro Neves.

Nia dehan, durante ne'e fasilita no rekusru umanu ne'ebé mak iha, hetan apoiu husi País amigu sira hanesan Portugál, Austrália, Amérika, Xina, Indonézia, inklui seluk tan ne’ebé durante ne’e fó sira-nia apoiu jeneróza ka apoiu ho laran tomak ba dezenvolvimentu Komponente Navál nian sai forsa ida ne’ebé forte hodi defende rikusoin Timor-Leste nian iha tasi.

Iha fatin hanesan, Ministru Defeza Kontra-Almirante Donanciano da Costa Gomes "Pedro Klamar Fu'ik" dehan, dezenvolvimentu Komponente Navál ne'e presiza investe iha área oi-oin.

"Ita presiza sosa ekipamentu meiu ki'ik-book hodi koloka kada postu sira hodi kontrolu tasi nune'e mós investe illa kapasitasaun, infraestrutura," nia hatete.

Nia hatutan, dezenvolvimentu ida ne'e la’ós halo milagre de'it, maibé presiza tempu hodi rezolve etapa por etapa.

Nia dehan, tanba ne'e husu ba Falintil Forsa Defeza Timor-Leste (F-FDTL) liuliu Komponente Navál atu hala'o misaun tuir lai rekursu no ekipamentu ne'ebé iha hodi asegura tasi no prevensaun krime iha tasi.