- Publika iha: 16 Setembro 2011
Lei Teras e Propriedade ne’ebe durante ne’e tama ona iha Parlamentu, tuir Deputadu Manuel Tilman katak sei diskute no aprova iha Outubru fulan oin maibe karik lakonsege sei muda fali ba tinan oin.
“Tanba iha dia 15 Outubru osan tama mai buat hotu-hotu tenke para,” hateten Prezidenti Partidu Klibur Oan Timor As’ wain (KOTA) Manuel Tilman,semana kotuk iha Parlamentu Nasional.
Tilman hatutan, lei ne’e rasik pasa ona iha jeneralidade e agora tama ba diskusaun espesialidade nian e durante ne’e lei seidauk bele aprova tanba lei kodigu sivil seidauk aprova.
Entretantu tuir Deputadu Mario Viegas Carascalao, katak lei teras e propridade ne’e rasik tama iha PN iha komisaun A desde tinan kotuk kedas maibe to’o agora seidauk halo diskusaun hotu.
“Lei konaba rai nian mak ami komisaun A halo reuniaun ida ,membru komisaun A la mosu hotu ,ami nain hat deit mak mosu iha neba desidi katak, lei rai nian tenki sai preoridade ida”Mario tenik.
Relasiona ho kestaun ne’e, Mario konsidera Komisaun laiha kapasidade atu hare lei ne’e. “Se komisaun A laiha kapasidade atu rezolve, bele kria komisaun eventual ida para hato’o ba plenaria tanba ami nia planu iha fin de Outubru lei ne’e tenke prontu tanba ema barak mak oho malu tan hadau malu rai,”nia katak.
Iha fatin hanesan Deputadu Estanislao da Silva hateten, lei rai nian iha ona komisaun maibe la hatene bainhira mak despaisu ba parlamentu hodi diskuti.
“oras ne’e dadauk komunidade hadau malu rai, ne’e mak foin lalais Governu aprova tiha dekretu lei ida para rejista rai nebe mak nain iha ona, e husu ba komunidade tomak atu labele oho malu e bainhira lei ne’e aprova mak sei rezolve,”nia husu.