Editorial – The Dili Weekly 2011!

Tinan 2011 ba The Dili Weekly foin liu ba hahu kedas iha Janeiru ho mudansa jestaun hosi Otelio Ote, nudar fundador ida ba Jornal The Dili Weeky ne’ebe kaer jornal ba tinan rua maibe tenki fila ba atu kaer fali Timor Post nudar nia Diretor iha 2011 hahu.
Emanue Braz, fundador The Dili Weekly seluk, fila mai iha Dili hafoin fulan hirak iha liur halo trabalhos atu simu reponsabilidade kona ba jestaun jornal ne’e. Ba 2011 nia konsegue nafatin kaer jornal no fo kontinuidade ba servisu diak Irmaun Ote hahu uluk kedas. Maibe nia missaun mak atu halo The Dili Weekly sai jornal de referensia iha Timor-Leste no mos ba se-se deit mak hakarak mai hela, servisu, passiar iha ita nia rai.

Maibe se mak dehan katak moris iha ilha ida moris fasil no relax....Karik nune ba organizasaun ka ema seluk maibe ba jornal kik ida hanesan The Dili Weekly dezafius barak hasoru ami maibe ami koko nafatin ho ami nia dedikasaun no forsa vontade no fiar kona ba papel importante media iha sosiedade.
Media Massa iha funsaun prinsipal tolu: atu Informa, atu Eduka, no atu Entreten (Haksolok). The Dili Weekly informa ka la’e; informa. The Dili Weekly eduka ka la’e; eduka. The Dili Weekly halo ema haksolok ka la’e, halo (dala ruma tanba edisaun ba Ingles dala ruma mos estranho oituan).
Maibe karik ami bele korriji persepsaun sala ida ne’ebe ema balun le The Dili Weekly hanoin. The Dili Weekly LA IHA doador permanente ka ossan barak segredo ne’ebe uza atu produz produto media ho kualidade aas (maske sei ha falhansus balun). Ami sobrevive fulan-fulan liu hosi assinaturas, faan iha dalan no publisidade limitadu ne’ebe ami hetan. Ossan lukru ami hetan ami investe fali iha organizasaun atu aumenta salariu ba staff ka aumenta rekursus ba organizasaun. Dala ruma iha hanoin sala katak iha Timor-Leste presiza ossan barak atu halo buat ruma ho kualidade. Karik The Dili Weekly bele sai modelu ida kona ba oin ho ossan kik Timoroan sira bele halo buat ida ho kualidade aas.

Nune duni doadores favour ida toma atensaun ba. Iha 2011 The Dili Weekly la konsegue hetan fundus hosi doadores atu suporta ami nia organizasaun. Doadores barak mak taka sira nia odamantan ba ami, no ami la dun hatene lolos tanba saida. Karik tanba doadores hanoin The Dili Weekly nudar empreza privada? Karik razaun mak ida ne’e ami diskonkorda oituan ho analiza ida ne’e. Ami prefere hanoin kona ba The Dili Weekly hanesan Empreza Sosial ida. Ami fan ami nia jornal no publisidade no assinaturas atu ami nia jornal bele sustentavel no mos atu garante The Dili Weekly nia independensia editorial. Tuir ami nia perspektiva fundus hosi doadores atu fo oportunidade ba The Dili Weekly atu lao neneik no mos atu amadurese and dezenvolve no la tenki monu ba tentasaun tenki halo aliansas ho partidus politikus, bisnis bo’ot ka intereses seluk ne’ebe bele kompromete integridade jornalistika ami nian.

Timor-Leste la os rai dezenvolvido ida ne’ebe media mos bisnis bo’ot. Iha Timor-Leste saida mak ami koko halo mak atu informa, eduka no haksolok no sobrevive ho funds ne’ebe limitadu tebes. Ida ne’e la signifika katak iha tinan sanulu mai The Dili la nafatin sustentavel ka professional liu maibe ida ne’e sei la akontese iha 2011, ka 2012, ka 2013, karik presiza tinan sanulu tan liu hosi enfrenta difikuldade oin-oin. Liu liu wainhira jornais nasional presiza kompete ho jornal Mala’e ida ne’ebe hadau tomak merkadu publisidade iha Timor-Leste no la fo kontribuisaun ba media rai laran no nia konteudu la iha informasaun maibe figuras ho kor ka publisidade kapas fo hosi belun ba sira nia belun. Maibe ba ida ne’e ami hato’o mensajen, ami pronto atu enfrenta! Lalais deit media lokal sei to’o mos iha ne’eba.

Maibe dezilusaun ida tan mak doadores tradisional media nian (AUSAID no USAID) desidi katak iha 2012 sei la fo tan fundus bo’ot ba media iha Timor-Leste. Maibe ho Eleisaun Jeral besik ona iha 2012, Prezidensial no Lejislativa, ami mos la komprende mudansa politka ne’e. Liu liu tanba iha tinan sanulu liu ba, sira tau milhaun $10 ba dezenvolve media lokal liu hosi Organizasaun Naun Governamental (ONG) international lubuk (lima), maibe wainhira tempu to’o atu husik media lokal uza fundus hosi doadores rasik atu dezenvolve nia aan rasik, doadores desidi atu dada tapete hosi media nia ain okos. Razoens ba ida ne’e mos la dun klaru ka lojiku, liu liu tanba maske milhaun $10 hanesan ossan barak maibe presiza hanoin katak persentajem ba ONG sira ne’ebe implementa programa (besik milhaun $2 ka liu), depois barak mos uza atu selu salariu profesionais internasional not mos estipendio, barak uza atu harii projektus tuir sira nia hakarak (elefantes mutin) no ikus fali hosi montante ne’e, fundus oitaun mak uza atu harii infrastrutura mamar media nian hanesan treinu kona ba jestaun no jestaun finansas no seluk tan.

Nune mos Eleisaun Jeral 2012 sei hetan kobertura diak hosi media? Karik, maibe la os hosi media nasional maibe karik ita sei haree mala’e barak mak mae iha ita nia rai atu halao fali media lokal nia servisu tanba ema balun ho ossan senti katak media iha Timor-Leste inadekuadu no nune la merese hetan tan fundus hosi doadores. Ami rekonhese katak AUSAID sei aloka besik $100.000 ba organizasoens media halao servisu balun kona ba eleisoens hanesan edukasaun sivika no treinu jornalismu maibe ida ne’e kompara ho milhaun $10 ne’ebe fo ba ONG internasional atu harii ami nia kapasidade hateten saida los? Maibe iha tan pontu ida kona ba ida ne’e hanesan mos profisaun hanorin. Wainhira estudante ida la dun hetan rezultadu diak iha eskola se nia kulpa, professor ka estudante nian? Ami hatene katak iha nasaun dezenvolvido professor nia abilidade atu motiva no fo konhesimentu ba estudante kestiona kedas. Maibe iha nasaun sei dezenvolve hela, kulpa dun bebeik ba lokal sira la os ba internasiona sira ne’ebe mai iha ne’e “hanorin” ami.

Karik atitude ne’e mak Hotar Dezenvovimentu ne’ebe G7+ harak atu korriji.
Maibe kona ba notisias seluk kona ba The Dili Weekly. Iha 2011 ami mos servisu ho jornalistas lubuk ida, barak ne’ebe tanba razaun oin oin la kontinua ho jornal no to’o ikus desidi katak The Dili Weekly la os jornal sira buka atu pratika sira nia abilidade. Ami sei nafatin hakarak hatoo ami nia obrigado barak ba sira nia loron, semana ka fulan sira suporta ami bele tahan tinan ida tan.

Iha 2011 The Dili Weekly mos konsegue halo tranzisaun hosi imprime iha impressora komersial ba uza deit iha Impresora ba Media Independente (IPPTL). Maibe ida ne’e mos komiku oituan tanba ema balun mos hateten katak ami sei la konsegue halo IPPTL lao ba oin no katak IPPTL projetu falhadu no dun kulpa ba media lokal kona ba tanba sa sira (NGO Internasional ho fundus bo’ot) la konsegue atu implementa projetu ne’e. Karik The Dili Weekly bele dala ida tan koriji sala bo’ot ida ne’e ho faktu katak desde IPPTL hamrik mesak staff hotu IPPTL nunka falha simu sira nia vensimentu, sempre halao manutensaun ba ekipamentu, no mos konsegue sosa material rasik atu bele print iha IPPTL ho folin kik. Ami hein katak jornal independente seluk sei hahu imprime iha IPPTL iha tinan foun atu hamutuk ami bele kontinua prova sira ne’ebe duvida no la gosta media lokal katak sira sala. Team IPPTL, Mario, Anto, Alcino no Natalino, The Dili Weekly agradese imi.
Ba notisias seluk kona ba The Dili Weekly 2011/2012.
Ermelita ami nia editor mos hetan oan bebe feto oan ida iha Outubro liu ba no agora sei iha lisensa maternidade no sei fila atu edit fali notisias no treinu iha Janeiru 2012.
Faustina ami nia ofisial administrasan mos issin rua foin mak fulan hat no sei hetan bebe oan no aumenta tan ba familia The Dili Weekl iha 2012 klaran.
Josefina iha Janeiru hahu sei deloka fila fali ba nia rai Baucau atu sai The Dili Weekly nia korrespondente ba rejiaun Leste nian.
Iha Dili, Paulina, Ezequiel no Venidora sei kontinua nafatin halo reportajen kona ba saida mak akontese iha kaptial.
Iha Outubru liu ba The Dili Weekly mos halo lansamentu ba The Dili Advertiser, jornal insert publisidade hatama iha The Dili Weekly laran atu koko dada tan fundus atu bele The Dili Weekly aumenta nia kapasidade iha 2012. Antonio no Osvaldo sei kontinua nafatin servisu atu halo pajinas hat sai walu, sanulu resin rua...
Rosito mos kona ba grafiku no layout hahu destaka ona no agora daudauk nia ho webdesigner Armindo ne’ebe mai vizita nia familia iha Suai durante nia ferias hosi servisu iha UN Congo, Africa, treinu hela Rosito kona ba oinsa update konteudo ba ami nia website: www.thediliweekly.com atu nune ami bele post konteudu lalais liu semana semana.

Clau kontinua nafatin fahe jornal semana semana no buka assinantes foun atu ami nia le-nain sira bele aumenta tan iha 2012. Maske nia seidauk fiar aan 100% neneik nia mos sei konsegue kontrola ami nia vendedores iha dalan atu sira kontinua hametin The Dili Weekly nia prezensa iha dalan-dalan Dili laran nian.
Nune mos ami hatoo ami nia despedida no boa viajen semana ne’e ba kolega Lorraine ne’ebe hamutuk ho The Dili Weekly fulan tolu (ne’en) ona servisu hamutuk ho ami atu halo The Dili Weekly nudar organizasaun sensitivu kona ba isu jender no konsiente no mos suporta ami dezenvolve ami nia Pajina Jender no mos hakerek Jender Policy ba The Dili Weekly. Ami hein katak iha 2012 nia sei bele fila fali mai atu servisu ho media iha Timor-Leste atu kontinua nia servisu kona ba suporta no eduka sosiedade liu hosi media kona ba ekuidade no igualidade jender iha Timor-Leste.

Iha Novembro 2011 ami mos hatoo boasvinda ba Joao atu suporta ami ho tradusaun Tetun-Ingles, no maske nia gosta liu fatuk; nia mos hatene sevisu diak los ho lia-fuan.
Valor espesial ba Florinda ne’ebe maske nonok deit reprezenta espiritu no forsa no kaer metin The Dili Weekly lor-loron.
Kona ba hau, Emanuel, uluk nanin hau hakarak husu deskulpa lori naran The Dili Weekly kona ba hakerek, fo sai, koalia, buat ruma ami halo iha 2011 ne’ebe karik la kona ema ruma nia laran ka halo ema ruma senti la diak. Ida ne’e la os ami nia intensaun. Maibe karik atu ajuda ami sai diak liu tan bele hatoo rekomendasaun kona ba oinsa mak ami bele sai diak liu tan iha 2012 liu hosi haruka email ba info@thediliweekly.com atu nune ami bele refleta, avalia no bele dezenvolve diak liu tan ba oin.
Lori naran familia tomak The Dili Weekly hau hatoo Votos Santo Natal 2011 no Tinand Found Feliz no Prospero ba tinan 2012.

Happy Readings no Ho Ksolok!