Governu Abandona Airin Eletrisidade

Governu liu husi Sekretariadu Estadu Eletrisidade abandona airin eletrisidade iha aldeia Lohomato, suko Com iha munisipiu Lautem.

Membru Komisaun E (infra-estruturas, transporte e telekomunikasaun), Deputada Albina Marcal, hateten airin eletrisidade governu  tau iha aldeia ne’e husi kedas 2013, maibe to’o agora governu seidauk ba monta.

“To’o agora airin sira ne’e iha ne’eba hela balun sai fruzu ona,” Deputada Marcal hateten, iha Parlamentu Nasional.

Nia dehan, tuir lolos governu monta ona airin, tenke kontrata ona kompania balun hodi kaer projetu ne’e.

“Maibe to’o agora seidauk book,” Deputada ne’e lamenta.

Tanba ne’e, nia husu, ba governu relevante atu haree ba asuntu ida ne’e, komunidade iha fatin refere presiza ahi.

Hatan ba kestaun ne’e Sekretariu Estadu Eletrisidade, Januario Pereira, rekonese katak fatin lubuk ida mak to’o oras ne’e eletrisidade seiduak tama inklui aldeia Lohomato.

“Lohomato ne’e iha liu foho leten ne’eba, maibe prosesu agora la’o hela,” Pereira hateten.