MEJD Husu Dirijente Eskolar Normaliza Merendar Eskolar

Ministerio Edukasuan Juventude no Desporto (MEJD), husu dirijente eskola sira normaliza fali programa merenda eskola hanesan bain-bain tanba durante fulan tolu (3) nian laran programa refere parado provizorio tiha tanba surtu global Covid-19 no estadu emerjensia deklara iha rai laran.

Diretor Nasional Aksaun Sosial Eskolar (DNASE), MEJD, Joaquin Martins hateten husi fulan maio, Junho, Julio no Agosto 2020 implementasaun programa merenda eskolar ne’e parado tanba situasaun COVID-19 no prosesu aprendisagem la la’o.

“Maibe ita hare eskola sira komesa hahu fali ona prosesu aprendisagem tanba ne’e MEJD hanoin atu normaliza fali merenda eskolar iha eskola tuir dia efetivos hanesan bai-bain,” Diretor DNASE Martins hateten.

Tanba ne’e nia husu ba direjente eskola sira tenke halo proposta ba finansas munisipio administrasaun estatal nune’e bele porograma merenda eskolar bele normaliza.
“Ita husu ba dirijente sira atu normaliza fali merenda eskola hahu iha fulan Setembro ne’e,” nia informa iha MEJD Dili.

Nia dehan, orsamento konaba merendar eskolar ne’e iha ona finansas munisipio, no dirijente eskola sira mak tenke halo proposta tuir montante estudante nune’e bele foti osan hodi normaliza fali merenda eskolar.

Entretanto, Diretor Escola Ensino Baziku Rumbia, Abilio Pereira da Conseicao hateten konaba merenda eskolar provizorio para lai tanba preparasaun ne’e seidauk hatene lolos ema prepara ne’e oinsa.

“Fizikamente ita hare ema ne’e saudavel maibe iha laran ne’e ita la hatene ema nia kondisaun,” Diretor EBC Rumbia Preira hateten.

Tanba ne’e sujere merenda eskolar ne’e labele hala’o lai, tanba husi merenda eskolar ne’e mos bele hadaet moras covid-19 ne’e rasik.

“Maibe governo hakarak hala’o fali entaun kuntinua ba, maibe ita hare la seguru tanba ema ba kompras mos iha merkado, ita labele hatene katak fatin ne’e livre ka lae,” nia informa.

Tanba ne’e husu governo diak liu tinan ne’e para lai, tinan oin mak kuntinua implementa fali merenda eskolar maibe tenke garante katak livre ona husi Covid-19 iha Timor-Leste.

“Ita hare katak merenda eskolar ne’e la implementa mos sei la fo impakto ba partisipasaun estudante nian iha aula,” nia hateten.

Enkuanto nia dehan, total estudante iha eskola refere hamutuk nain 676 hahu husi primeiro ano to’o sesto ano sira ne’e aktivo hela iha prosesu aprendisagem.