Bolseiro Iha Area Peska no Marinha Halo Estajio Profesional Iha MAP

Bolseiro nain 38 ne’ebe mak estuda iha area peska no marinha iha Indonesia hahu tinan 2016 remata ona sira nia estudo iha tinan ne’e 2020, Ministerio Ensino Superior Siensia no Kultura (MESSK) integra ona ba iha Ministerio Agrikultura no Peska (MAP) hodi halo estajio profesional.

“Estudante sira ne’e ita integra iha ministeiro agrikultura no peska tanba estudo ne’ebe durante ne’e sira hala’o ligado iha area MAP, tanba ne’e ita lori sira mai halo estajio profesional iha ne’e hodi valida sira nian konhesimento nune’e bele kompete ba kampo de serviso,” Ministro Longuinhos hateten.

Nia dehan, konaba rekursu humanu MESSK mak prepara depois mak serviso hamutuk no ministerio relevante sira tuir area ne’ebe mak bolseiro sira estuda ba ne’e nune’e sira bele ba aprende.

“Bolseiro 38 ne’e ita prepara iha area peska no marinha tanba ne’e ita kopera ho ministerio agrikultura no peska, hodi bele involve sira aprende iha MAP,” nia hateten.

Entretanto, Ministro MAP, Pedro dos Reis hateten, MAP kontene tebes tanba iha ona forsa husi matenke nain sira ne’ebe mak ba hamutuk hodi dezelvolve iha setor peska no marinha iha Timor-Leste.

“Ita hetan tan membro 38 ne’ebe mak remata ona sira nia estudo iha area peska no marinha nian hodi investe iha area refere,” nia hateten.

Maibe nia dehan, atu trata rekursu humanu sira ne’e MAP ho MESSK deit labele maibe presija serviso hamutuk ho linha ministerial hodi trata estudante sira tuir matenek ne’ebe mak sira hetan durante iha sira nia estudo.

“Ita sei esforso hodi serviso hamutuk hodi buka investimento ne’ebe mak ne’ebe diak hodi bele involve matenek nain sira ne’e hodi halo serviso tuir sira nian skill,” Ministro MAP Reis hateten.

Iha parte seluk estudante bolseiro Reinaldo do Santos hateten, agradese ba governo Timor-Leste tanba bele tulun ona sira hodi halo estudo iha area peska no marinha nian.

“Ami hotu atinje ona objetivo no fila ona mai, mai husu nafatin atu bele fo oportunidade mai ami atu bele implementa konhesimento ne’ebe ami hetan, hodi dezenvolve iha area peska no marinha,” bolseiro Santos hateten.

Tanba ne’e nia husu governo atu utiliza konhesimento ne’ebe mak sira hetan, tanba konhesimento ne’ebe sira hetan ne’e uza osan estado nian.

“Tuir lolos ne’e ami tenke kria rasik kampo de serviso maibe, ami lakoi ida ne’e akontese, tanba ami hakarak serviso hamutuk hodi dezenvolve iha area peska no marinha nian tuir finalizade ne’ebe mak ami hetan iha prosesu estudo,” nia hateten.

Tanba ne’e nia espera katak MAP iha ona plano ba estudante bolseiro iha area peska no marinha iha futuru.