- Publika iha: 03 Setembro 2020
Ministério Koordenadór ba Asunto Ekonómiku (MKAE) delega ona medidas rekoperasaun tolu (3) ba Ministerio Solidariedade Sosial Inkluzaun (MSSI) atu toma responsabilidade ba, tuir planu rekoperasaun ekonómiku rai laran.
Tuir Ministro MKAE, Eng. Joaquim Amaral, delegasaun responsabilidade ba MSSI refere importante tanba MKAE agora kordena hela planu rekoperasaun ekonomiko, no iha planu ne’e kontempla medidas 4, no medidas 3 monu iha MSSI ninia responsabilidade.
“Tanba ne’e mak ami tenke artikula kordena malu para atu oinsa bele aselera ezekuta programa ne’e ho diak. Medidas ne’e ajuda ba kompañia sira atu hahú fali ho sira nia atividade negósiu sira, atu ajuda setor informal sira hodi bele registu seguransa sosial, no ikus liu mak ajuda sira ne’ebe mak retensaun katak sira nia obrigasaun iha sistema seguransa sosial mak governu ajuda sira hodi selu parte balun hanesan 10%,” dehan nia.
Ministro Amaral haktuir katak medidas hirak ne’e bele ajuda produtór ka agrikultura nain sira atu bele badinas halo toos hodi prodús produtu tanba mercadu mak kompradór no katak programa rekoperasaun ekonómika sei sosa hahan sira ne’ebé mak tama ona iha lista, no faan iha mercadu lokál no nasional, nune’e ajuda komersiante sira, no inklui bele ajuda mós sira ne’ebé mak halo toos.
“Husi medida 4 ne’e, ida hela ba MKAE mak sesta baziku, oinsa atu buka sosa haan sira ne’ebé faan iha mercado nasionál, atu nune’e distribui fali ba ema ida-ida kada fulan,” nia haktuir.
Entretanto Prezidente Administrasaun Institutu Nasionál Seguransa sosiál (INSS), Longuinhos Armando Leite, INSS prontu asegura dezisaun governu nian.
“Institu Nasional Seguransa Sosial hanesan tekniku ami prontu para atu asegura dezisaun husi governu nian, tanba rekoperasaun ekonómia ne’e iha medidas tolu ne’e sei involve seguransa sosial iha prosesu pagamentu nian, liu-liu iha medidas 3 ne’e. Ba medidas 3 ne’e, 41.5 milhões [dolar amerikanu],” nia dehan.
Nia haktuir katak agora ne’e sei hadiak liña kordena deit, tanba osamentu refere sei lori ba parlamentu nasional, komissaun C konsidera.