- Publika iha: 04 Setembro 2020
Reprezentante Organizasaun Mundial Saúde (OMS) iha Timor-Leste, Doutor Rajesh Pandav hateten agora dadaun seidauk iha vasina ne’ebe efetivu no seguru, maibe kandidatu vasina 10 resin husi 200 ne’ebe dezenvolve mak halo ona teste ba ema.
Nia dehan, husi kandidatu vasina sira ne’e iha 3-4 mak tama ona faze dala tolu inklui mos vasina ne’ebe dezenvolve iha nasaun China.
“To’o agora seidauk iha vasina ba prevensaun COVID-19, maibe servisu lao hela iha mundu atu hetan vasina ne’ebe efetivu no seguru tanba ne’e introdusaun populasaun vasina sei hahu, bainhira ami hetan ona evidensia forte konaba efisensia no seguransa,” nia hateten via email.
Nia dehan, distribuisaun vasina hanesan servisu ida ne’ebe importante tebes OMS atu halo hamutuk ho nasaun membru sira.
Nia haktuir, OMS hamutuk ho GAVI no CEPI hanesan parte ida husi akselerator ACT, dadaun ne’e halo proposta no diskusaun ho nasaun membru sira kona ba mekanismu alokasaun ne’ebe justu no igual.
Nia hatutan, sira mos diskute grupo ne’ebe sai prioridade atu hetan vasina hanesan profesionais saúde sira, pesoal importante seluk, no populasaun risku sira no OMS servisu ho governu Timor-Leste, liu-liu ministerio da saúde iha prosesu ida ne’e.
Nia dehan, OMS servisu hamutuk ho kompania no agensia seluk liu husi akselerator ACT atu aselera teste vasina no hasa’e volume produsaun atu nasaun sira bele asesu ba kuantidade ne’ebe sufisiente bainhira vasina ne’e disponivel ona.
Nia espera, fin do ano 2020, bele hetan ona vasina no iha tinan 2021, disponivel ona ho kuantidade ne’ebe barak atu nasaun sira bele asesu hodi fo vasina ba populasaun prioridade sira.
Iha parte seluk, Embaixador China iha Timor-Leste, Xiao Jianguo hateten vasina ne’ebe dezenvolve iha China tama ona iha faze dala tolu nian, maibe sei ba emergensia deit.
“Iha ema balun uza ona, maibe ba emergensia deit, seidauk uza ba ema hotu no seidauk komersial. Sira espera iha tinan oin mai bele mundu hotu uza,” nia hateten.
Nia dehan, China kontinua halo esforsu atu aselera teste ba kandidatu vasina ne’ebe iha atu mundu bele asesu hodi halo prevensaun ba moras COVID-19.