- Publika iha: 08 Setembro 2020
Xefe Departamentu Pediatria, iha Hospital Nasional Guido Valdares (HNGV), medika espesialista labarik, Lourdes Leão hateten durante fulan walu, Janeiru to’o Agostu tinan 2020, labarik nain 9 husi nain 294 ne’ebe baixa mak mate tanba sofre moras diaréia ho komplikasaun malnutrisaun no infesaun.
Nia salienta, moras diaréia fasil atu halo tratamentu ho oralit atu asegura balansu liquidu iha isin, maibe dala barak familia la fo importansia hodi demora to’o pasiente monu ona ba malnutrisaun grave aguda entau risku ba mortalidade a’as.
“Pasiente barak tama iha ne’e kondisaun malnutrisaun grave aguda risku mate no hetan komplikasaun a’as liu kompara ho sira ne’ebe estado nutrisaun diak. Iha kazu nain lima mate tanba diaréia ho komplikasaun malnutrisaun grave aguda no nain tolu diaréia komplikasaun infesaun iha kakutak laos deit te oan no ida seluk estado nutrisaun diak, maibe atraza iha tratamentu tanba mai ho kondisaun ne’ebe grave loos entau esforsu hotu ita halo iha hospital lakonsege salva pasiente nia vida,” nia hateten iha servisu fatin Bidau, Dili.
Nia dehan, kauza ba moras diaréia mak microbios, liu-liu bacteria no virus tanba ne’e bainhira labarik sira nia resistensia isin ladiak atu kontra moras ne’e bele akontese komplikasaun sira hanesan infesaun.
Nia haktuir, grupu risku ba morbilidade no mortalidade diaréia mak labarik sira tinan lima mai kraik tanba familia sira tenke fo importansia atu halo prevensaun liu husi pratika moris moos hanesan fase liman, prepara labarik sira nia hahan ho liman moos atu evita kontaminasaun.
Iha parte seluk, Jestor Klinika Bairo Pite, Inacio do Santos hateten, presiza iha kondisoens proprio atu eduka inan sira oinsa prepara hahan ne’ebe diak no seguru ba labarik sira tanba moras diaréia iha ligasaun ho ijiene.
Nia dehan, dala barak labarik sira sofre moras diaréia lahalo tratamentu monu ba malnutrisaun ho komplikasaun oioin entau barak mak lakon vida.
“Tenke hanorin inan sira kona ba hahan ne’ebe nutriente no oinsa prepara hahan ne’ebe diak ba oan sira,” nia hateten.
Nia dehan, dadaun ne’e inan barak halao servisu profesional iha liur tanba ne’e barak liu fo susuben formula ba bebe ho bibiron no laiha atensaun ba ijiene hodi prejudika labarik sira nia saúde hanesan labarik barak hetan moras diaréia.