- Publika iha: 08 Setembro 2020
Xefe Gabinete Kontrolu Kualidade no Komunikasaun Sosial, Iha Hospital Nasional Guido Valdares (HNGV), iha Dili, Sara Maria Xavier hateten iha fulan Agostu tinan 2020, banku emergensia registu kazu tenta oho a’an hamutuk nain 16 tanba stress no la simu realidade moris.
“Kazu iha tentasaun hakarak oho a’an ne’e hamutuk nain 16, kompostu husi feto nain 8 no mane nain 8,” nia hateten iha servisu fatin Bidau, Dili.
Nia hateten, atendimentu ba pasiente sira ne’e tuir protokolu atendimentu nian tanba iha ligasaun ho psikologia entau pasiente nain lima mak tenke baixa iha sentru acute care atu hetan tratamentu intensivu no akonselhamentu hodi bele hetan rekuperasaun.
Alende ne’e, sira mos simu registu kazu violensia fisika domestika hamutuk nain 6, violensia fisika sosial hanesan hana ho rama ambon nain 1, tuda ho fatuk nain 9, ema baku nain 20, ta’a ho katanak no sona ho tudik nain 5.
Iha parte seluk, Responsavel Programa Saúde Mental, iha Ministerio da Saúde, Anabela Guterres hateten kazu tenta oho a’an no oho a’an ne’ebe akontese durante ne’e barak liu mak sidadaun sira ho idade joven sira, liu-liu sira idade eskola.
Nia dehan, iha fator oioin ne’ebe kontribui ba ema atu pratika aktu oho a’an, maibe kazu iha Timor barak liu mak problema relasaun domin tanba sira laiha kapasidade atu rezolve problema entaun hili dalan badak oho a’an.
“Ami planu ona atu intensifika liu tan atividade sensibilizasaun ba estudante sira iha eskola sira kona ba moras mental no oinsa buka tulun bainhira hasoru problema tanba numeru kazu tenta oho a’an ne’e barak loos ona,” nia hateten.
Nia dehan, iha kazu balun ema ho kondisaun normal la sofre moras mental, maibe ho intensaun rasik halo pratika oho a’an tanba lasimu realidade ne’ebe akontese ba sira nia aan.
Nia rekonhese atendimentu psikososial seidauk to’o iha nivel sentru saúde sira hotu tanba ne’e sira estabelese linha hotline 12123 atu sidadaun sira ne’ebe presiza atendimentu psikososial bele liga hodi hetan tulun.