HNGV: Dosaun Voluntario Menus Implika Ba Stok Ran

Diretur Servisu Apoio Diagnostiku no Terapeutico, iha Hospital Nasional Guido Valdares (HNGV), Doutor Mendes Pinto informa, dala ruma akontese pakote ran laiha tanba ema ne’ebe voluntario fo ran menus tebes, maibe ba kazu emergensia sira kontaktu membru Polisia Nasional no forsa F-FDTL sira atu apoia ran.

Nia dehan, kada fulan pasiente ne’ebe presiza halo transfusaun ran kuaze 300 resin, maibe ema ne’ebe fo ran voluntario 20 resin deit tanba ne’e hakarak lakohi familia sira tenke fo ran.

“Ita nia problema ne’e mak doasaun ran tanba ita hare husi dadus doasaun voluntario menus, kuaze fulan ida ema nain 20 deit husi 300 resin doasaun. Entaun barak liu subtituisaun katak familia moras obrigadu tenke fo ran tanba fabrika ran mak ema,” nia hateten iha servisu fatin Bidau, Dili.

Nia hatutan, iha kazu balun pasiente mai husi munisipio presiza ran no familia iha Dili laiha entaun sira kontaktu instituisaun sira hanesan PNTL, F-FDTL, no eskola sira, atu apoia ran tanba ran iha hospital mos laiha.

Nia haktuir, ran iha gurpo hat mak A, AB, B no O, maibe ran ne’ebe difisil liu atu hetan mak grupo ran AB.

Nia dehan, sidadaun hotu iha teritorio hatene ona, bainhira familia moras presiza ran sira rasik mobiliza familia hodi halo doasaun ran tanba ne’e ajuda tebes servisu atendimentu transfusaun ran iha rai laran.

Iha parte seluk, komunidade Domingos Soares hateten doasaun voluntario menus tanba ema falta koñesementu kona ba benefisiu husi fo ran regular ba ema nia saúde tan ne’e, presiza halo sensibilizasaun no kampanha publika ida kona ba benefisiu husi doasaun ran regular atu ema hatene.

Nia dehan, bainhira ema barak iha koñesementu mak sira sei voluntariumente halo doasaun hodi ajuda ema seluk ne’ebe presiza.

“Hau hanoin ran laiha laos kulpa hospital nian tanba ran mai husi ema ida entaun presiza atu konsiensializa ema hotu kona ba benefisiu halo doasaun regular ba saúde no sosiedade atu fanun ema ida-ida nia fuan hodi tulun ema seluk liu husi fo sira nia ran,” nia hateten.

Nia dehan, servisu transfusaun ran ne’e esensial tebes tanba ne’e presiza halo investimentu ida ne’ebe proprio atu hasa’e prontidaun servisu atu fo prestasaun servisu ne’ebe kualidade no seguru hodi salva ema nia vida.