- Publika iha: 22 Setembro 2020
Governo liu husi Ministerio Turismo Komercio Industria (MTKI), husu Timoroan hotu tenke sai turista iha rai rasik hodi apoio no promove fatin turismo iha Timor-Leste nune’e bele atrai turista internasional sira bele ba vizita mos.
Diretor Jeral MTKI, Jose Quintas hateten kada munisipio sempre iha fatin turismo, maibe Timoroan rasik lakoi halo vizita, hein deit turista estrangeiro mak vistiza no Timorona la iha intrese hodi vizita nune’e bele inspira ema seluk.
“Atu promove ita nia fatin turismo kada munisipio no hahan lokal sira, Timoroan sira tenke sai turista iha nia rai rasik nune’e bele promove, nune’e ema hotu bele hatene no bele dada turista estrangeiro atu bele vizita,” nia hateten.
Nia dehan, Timorona tenke iha esperiensia aventura no atrasaun hahu husi konsumo aihan lokal iha restorante favoritu, vitiza munisipio, luku tasi, koko kafe Timor nia sabor, no buat seluk tan ne’ebe Timor-Leste iha.
“Ita husu ema hotu atu bele iha solidaridade liu husi fahe foto fatin kultura no historiku, animal fuik nune’e mos mensagem liafuan furak ruma hodi atrai familia ka maluk sira seluk nune’e sira mos bele vizita,” nia husu.
Nia informa tan katak dadaun ne’e, empreza turismo barak mak iha situasaun difisil, maibe governo nafatin suporta hodi ultrapaza iha krize COVID-19 nune’e Timor-Leste bele nakloke an hodi simu turista internasional sira.
Iha parte seluk, Diretor Ezekutivo FONTIL Daniel Silva hateten, atu promove fatin turismo iha Timor-Leste sai koinesido la’os husi ema estrangeiro deit maibe Timoroan mos bele.
“Ita hare dadaun ne’e ita nia maluk joven sira halo sira vitiza fatin turismo hotu tanto turismo domestiku no religiosa, sira halo publikasaun ba imagen ne’ebe sira foti iha media social ho mensagem furak ne’ebe mak atrai tebes,” nia dehan.
Nia dehan, vizita Timoroan ba fatin turismo sira ne’e diak ona, maibe governo mak tenke investe nune’e bele dezenvolve tan turismo komunitaria sira halo furak liu tan.
“Ezemplo fatin balun ne’ebe mak ita nia komunidade sira halo ona tuir sira nia kbit, governo tenke investe nune’e bele dezevolve halo kapas liu tan hodi hatudo ba mundo katak Timor mos bele ona dezenvolve fatin turistiko no bele atrai sira nia matan no sira iha interese hodi vizita,” nia hateten.
Nia dehan, governo mos tenke tau seguransa iha fatin turismo sira hodi garante seguransa ba fasilidade iha fatin refere nune’e mos fo seguransa ba vizitante sira nune’e sira mos bele sente seguro.