Ministerio Interior Preve 50 Milhoes Hodi Selu Dividas

Ministerio Interior preve 50 milhoes iha orsamentu tinan 2020 nian hodi seluk dividas hahu husi tinan 2015 mai to’o ohin loron nian.

Vise MI, Antonio Armindo hateten, orsamento 50 milhoes refere hodi selu dividas hanesan husi PNTL nian hamutuk 2 milhoes resin, konaba dividas manutensaun, internet, no kombustivel, fardamento hanesan botas, no protesaun sivil nian hodi halo uma 7,000 ne’ebe mak afetado ba dezastre naturais maske governo foin mak halo 1,000.

“Tinan ida ne’e ita tau osan 50 milhoes hodi selu tiha dividas sira husi 2015 nian mai to’o ohin loron no ita tenke finaliza tiha uma 7,000 ne’ebe mak afeta ba dezastre naturais.

Nune’e tinan oin ita foku liu ba dezenvolvimento instituisaun,” nia hateten.

Maibe nia dehan, osan 50 milhoes ne’e hodi seluk dividas sira ne’e, depois, sei falta montante naton hodi kobre ba fulan rua nian.

Entretanto, Komandante Jeral PNTL Komisario Fautino da Costa hateten, divida PNTL nian hahu husi 2015 ne’e hamutuk 2 milhoes, konaba halo manutensaun ba transporte sira, kombustivel ba halo serviso operasaun, selu internet, nune’e mos sosa farda ba PNTL sira.

“Tuir lolos dividas sira ne’e ita selu ona maibe tanba ita hare tinan hira nia laran ne’e ita la’o ho duodesimo, entaun ita labele selu dividas sira ne’e, maibe iha tinan ida ne’e ita finaliza ona dividas ne’e,” Komisario Costa hateten.

Entretanto, Diretor Fundasaun Mahein (FM) Joao Almeida hateten, dividas ne’ebe mak PNTL iha ne’e tanba durante ne’e ezekusaun orsamento ba PNTL ne’e kiik, kompara ho knar ne’ebe mak sira halo.

“Tuir lolos ne’e PNTL tenke iha ezekusaun ne’ebe bo’ot atu nune’e sira sosa kombustivel hodi halo operasaun kontrola komunidade no entidade estado nian, liu-liu iha area seguransa nune’e mos halo manutensaun ba kareta patrulhamento sira,” nia dehan.

Aleinde ne’e nia dehan, polisia atu halo serviso patrulhamento 24 horas hodi garante seguransa, maibe hare ba situasaun no kondisaun, kareta sira ne’ebe mak polisia utiliza la iha kondisaun nune’e mos eskuadra balun to’o agora la iha kareta, nune’e mos komputador hodi halo serviso seidauk iha.

“Tanba ne’e ita husu governo tenke tau osan ba PNTL atu nune’e bele rezolve problema no difikuldade ne’ebe mak sira iha nune’e hodi seguransa ba komunidade no entidade tomak. Ida ne’e sira nia papel, maibe tenke kria kondisaun,” FM Almeida dehan.