- Publika iha: 29 Dezembro 2023
Administradór Munisípiu Manufahi, Arantes Isaac Sarmento informa komunidade suku rua no aldeia 87 mak seidauk iha asesu ba liña eletrisidade, maibé optimista remata tinan 2023, suku hotu hetan ona naroman, liu-liu suku Bubu susu no Fahenehan.
Nia dehan komunidade ne’ebé seidauk iha asesu ba liña eletrisidade, tanba hela iha foho área remotas, entaun difisil.
“Ita iha 29 suku ne’ebé agora 27 mak hetan ona asesu ba liña eletrisidade, hela suku rua seidauk mak suku Bubu susu no Fahenehan, ne’ebé antes fin do ano suku hotu hetan ona eletrisidade. Nivel aldeia ita iha 137 aldeia kuaze 50 mak hetan ona enerjia eletrisidade. Dadaun ne’e prosesu la’o hela ikus tinan ne’e bele 98 aldeia asesu ona eletrisidade,” nia hateten hafoin partisipa iha enkontru revitalizasaun no aprovasaun suku pilotu ba programa KONSSANTIL nian iha salaun City 8 Manleuana, Díli.
Nia hateten uma-kain sira ne’ebé asesu ona ba eletrisidade balun kontribui ona ba konfre estadu liuhusi sosa pulsa, maibé barak husi EDTL sei fó tempu fulan neen to’o tinan ida uza gratuita tanba foin asesu ba eletrisidade.
Kona-ba bee moos, nia dehan 82% komunidade asesu ona ba bee moos. Maibé dadaun ne’e enfrenta hela situasaun bailoron naruk ne’ebé afeta ba kuantidade bee, tanba ne’e tenke halo oráriu atu ema hotu bele iha asesu.
Pessoal Apoia Suku, iha Suku Fahinehan, postu administrativu Fatuberliu, Munisípiu Manufahi, Cipriano Vasco hateten depois ukun aan tinan 20 resin, foin tinan 2023, komunidade sente naroman husi eletrisidade.
“Iha tinan 2023, eletrisidade foin tama iha ita-nia suku, maské foin atinji 60%,” nia hateten
Nia informa total xefe família iha suku Fahinehan hamutuk 347 ho populasaun 2006, kompostu husi feto 1035 no mane 991.
Nia espera ho implementasaun programa Konsellu Nasionál Seguransa Ai-han no Nutrisaun Timor-Leste (KONSSANTIL) nian ba kombate hamlaha no malnutrisaun bele hetan atensaun másimu husi liña ministériu sira atu dezenvolve infrastrutura bázika iha suku hodi kontribui hadia kondisaun moris komunidade nian.