- Publika iha: 29 Dezembro 2023
Vise-Governadór Banku Sentrál Timor-Leste (BCTL), Venâncio Alves Maria hateten balansu fundu petrolíferu iha trimestre da-tolu kobre 01 jullu to’o 30 setembru tinan 2023, tun ba billaun 17,520 kompara ho trimestre da-rua abril até juñu iha billaun 18,075.
“Relatóriu ne’e hatudu katak kapital fundu nian iha trimestre ikus loron 30 fulan-setembru tinan 2023, mak billaun 17,520 kompara ho billaun 18,075 iha fin trimestre anterior hafoin ajusta tiha dívida privada ba tinan 2022,” nia hateten liuhusi konferénsia imprensa kona-ba relatóriu fundu petrolíferu trimestre da-tolu tinan 2023, iha Banku Sentrál Timor-Leste, Díli.
Nia dehan iha trimestre da-tolu ne’e mós hatudu totál reseita ne’ebé tama husi taxa hamutuk millaun 57,06. No rendimentu brutu husi investimentu fundu hetan negativu millaun 307,15, kompostu husi devidendu no reseita ne’ebé simu husi investimentu rendimentu fiksu hamutuk millaun 121,71, mudansa iha valór merkadu nia negativu millaun 426,99 no mudansa cambiais negativu millaun 1,88 iha trimestre ne’e. Ida ne’e reprezenta rendimentu total portofoliu fundu iha trimestre ne’e mak -1,21%, enkuantu rendimentu sasukat iha períodu ne’e mak -1.33%.
Nia hatutan iha trimestre ne’e, orsamentu ne’ebé sai husi fundu hamutuk millaun 304,225, kompostu husi millaun 300 transfere ba orsamentu estadu iha fulan-juñu no millaun 4,225 ba kustu jestaun nian.
Nia haktuir rendimentu portofoliu investimentu merkadu finanseiru iha períodu ne’e mak -1, 30% kompara ho rendimentu referensia -1,44%.
Iha sorin seluk, Koordenadór Unidade Fundu Petrolíferu, iha Ministériu Finansas, Cosme da Costa Araújo hateten trimestre da-tolu hetan negativu, tanba banku sentrál iha mundu tomak hasa’e taxa jurus, entaun impaktu ba valór investimentu.
“Husi fulan-janeiru mai ne’e investimentu positivu, so trimestre ida ne’e mak negative, tanba nasaun barak hasa’e taxa jurus, entaun nia valór investimentu tun,” nia hateten.
Nia informa husi fulan-janeiru to’o agora, governu foti ona osan hamutuk millaun $790 husi fundu minarai hodi finansia orsamentu estadu.