Kompañia Abandona Projetu Melloramentu Bee Moos Iha Postu Laga

Xefe Suku Soba iha Postu Administrativu Laga, Munisípiu Baucau, Francisca Monica de Fátima Soares eziji responsabilidade kompañia vensedór ba projetu instalasaun bee moos iha postu Laga, tanba tinan ida ona projetu ne’e abandona hela.

Nia dehan iha tinan 2022, Primeiru-Ministru sesante Taur Matan Ruak ba hatur fatuk inan, maibé depois projetu ne’e la lao to’o agora.

“Ha’u nu’udar autoridade hakarak fó sai iha media atu ministériu relevante bele bolu kompañia fó justifikasaun, tanba projetu ne’e la mai husi munisípiu, diretamente husi nasionál,” nia hateten bainhira partisipa iha selebrasaun aniversáriu PNDS ba-dala 10 iha Sentru Konvensaun Díli.

Nia hateten projetu ne’e eziste duni iha suku Soba, entaun komunidade Soba mak sai benefisiáriu ba projetu ne’e, liu-liu uma-kain hamutuk 400 resin inklui edifisiu públiku sira.

Nia hatutan projetu ne’e tama iha projetu melloramentu bee urbana postu administrativu nian. No montante orsamentu ba projetu ne’e hamutuk $221,829.25.

Iha parte seluk, Administradór Postu Administrativu Laga, Domingos Loiola José Pereira rekoñese kompañia abandona projetu refere kleur ona, sein informasaun ba autoridade lokal sira.

“Kona-ba bee moos iha parte Laga nian, kompañia ida ne’ebé halo instalasaun agora halai ba iha ne’ebe hau mos seidauk hatene, tanba seidauk konfirma loloos,” nia hateten.

Nia hateten iha postu Laga parte urbana sei araska asesu ba bee moos, tanba ne’e edifísiu públiku sira laiha bee. Maibé nivel suku maioria iha ona asesu ba bee moos.