Estudu Viabilidade Merkadu Iha Munisípiu Tolu Finaliza Ona

Ministru Komersiu no Industria (MCI), Filipius Nino Pereira hateten estudu viabilidade ba infrastrutura merkadu iha munisipiu tolu hanesan Lautem, Baucau no Ermera finaliza ona tanba projeitu ho kustu bo’ot husi fundu infrastrutura mak desizaun governu nian.

“Ita identifika ona fatin balun hanesan iha munisípiu Lautem, Baucau no Ermera ne’ebe ita sei hahu ida ne’e tanba ita finaliza hotu ona prosesu ida estudu viabilidade no detail engineering design (DED) iha hotu ona. Espera liu husi sekretariadu grande projeitu bele implementa ona iha munisípiu balun,” nia hateten bainhira halo visita ba industria ki’ik iha aldeia Baya Leste, munisípiu Dili.

Nia hateten governu mos hahu halo estudu viabilidade ba merkadu taibesi, liu-liu rai 12 hektares atu re-vitaliza merkadu ne’e sai sentru komersial hodi fo fatin ne’ebe dignu ba vendedor sira faan no iha mos espasu ba komprador sira atu sosa sasan.

“Ba futuru ita hanoin dehan katak merkadu Taibesi bele sai sentru komersial ida. ita hakarak re-vitaliza merkadu Taibesi para nune’e bele akomoda numeru vendedor ne’ebé aumenta ba beibeik,” nia hatutan.

Nia haktuir ba tinan 2024, sira preve osan ho montante $200,000 hodi halo manutensaun ba merkadu Manleuana no Taibesi. Ba dezenvolvimentu infrastrutura ne’ebé bo’ot ne’e orsamentu mai husi fundu infrastrutura.

Iha parte seluk, Diretór Jestaun Merkadu no Turismu iha munisípiu Dili, Althur Henriques hateten sira halo ona manutensaun ba infrastrutura bazika iha merkadu Taibesi no Manleu, liu-liu haris fatin no bee.

Nia dehan vendedór sira ne’ebé sei faan iha espasu públiku sira hanesan estrada públiku El-emloi, Kampung Baru no Foho Osamean ne’e tanba iha ambisaun hakarak hetan rendimentu bo’ot laos espasu iha merkadu laiha.

“Rekursu mak ita dehan dadaun merkadu Manleu mamuk ema lakohi ba faan, merkadu Taibesi mos iha, maibe sira hakarak abisaun hetan buat lalais,” nia hateten.

Nia hateten presiza duni investimentu ne’ebé bo’ot atu re-vitaliza merkadu bo’ot rua Manleu no Taibesi atu bele asegura atividade komersiu lao ho diak hodi kontribui ba dezenvolvimentu ekonomia rai laran.