- Publika iha: 11 Abril 2016
Diretora Ezekutivu Organizasaun Hamutuk Ita Ajuda Malu (HIAM Health), Rosaria Martins da Cruz, hateten kompanha Super Merkadu Kmanek prontu sosa produtos husi grupos hortikultura 12 iha munisipio Ermera.
Grupos hortikultura 12 ne’e estabelese no hetan formasaun husi organizasaun HIAM Health no durante ne’e hetan suporta finanseiru husi kompanha Woodside, maibe, nia dehan, tinan 2016 ne’e sira hapara ona sira nia suporta ba grupos ne’e.
Atu garante sira nia sustentabilidade, nia dehan, HIAM Health iha responsabilidade hodi buka merkadu ba grupo produtores ne’e.
“Enkontru entre HIAM Health, Woodside no Kmanek positive, e ami sei lori grupo sira hasoru malu ho Kmanek hodi koalia diak liu tan kona ba kooperasaun ba oin,” Diretora HIAM Health Martins hateten, iha nia knar fatin Aimutin, Dili.
Nia hatutan, grupos ne’e estabelese iha tinan 2012 iha munisipiu Ermera, ho intensaun atu hadia nutrisaun no rendementu ekonomia familia grupos hirak ne’e.
Maibe, nia dehan,problemas bo’ot ne’ebe grupo produtores hasoru iha baze mak la asesu ba merkadu, tanba kondisaun estradas ne’ebe aat.
Kompanha Woodside nafatin suporta HIAM Health, maibe nia dehan, ba implementasaun programa to’os komunidade iha area rural no tinan ne’e (2016) implementa uluk iha munisipio Aileu.
Nia hatutan, apoiu teknikus ne’ebe HIAM Health fornese ba iha grupos ne’e mak ajuda dada bee ba to’os, material agrikultor no fo formasaun ba membrus grupos kona ba negosio nian.
Entretantu reprezentante grupo agrikultor, Jacob Martins Albino, merkadu mak hamate sira nia motivasaun atu halo to’os, tanba dala barak produtos ne’ebe sira iha ba konsumu familia no fo han animal deit.
“Governu seidauk fo fatin diak ba ami atu fa’an ami nia sasan,” nia preokupa.
Nia dehan, ema sei lakohi servisu hanesan agrikultor bainhira laiha merkadu ba sira atu fa’an sira nia produtus, tanba labele hetan rendimentu husi sira nia servisus.
Nia hatutan, atividades agrikultura ne’ebe sira halo iha munisipio Ermera mak kuda modo no aifuan ho variedade.
Iha parte seluk estensionista munisipio Viqueque, Feliciano Soares, hateten problema merkadu la’os deit iha munisipio Ermera, maibe kuaze iha teritorio tomak komunidades laiha asesu ba merkadu, tanba laiha kompanha atu sosa sira nia produtus.
Nia rekonese, katak iha agrikultores balun asesu ona merkadu hanesan agrikultor produtor fini sira tanba sira bele fa’an sira nia produtus ba governu no orgnanizasaun internasional sira maibe ba aihan seidauk.
“Iha tinan kotuk mak kompanha Azelda sosa agrikultor sira nia hare, maibe agora laiha ona,” nia hateten.