Sertifikadu rai nian ne’ebe fo ba rai nain nafatin validu

Ministra Justisa, Lucia Lobato, hateten mesmu lei rai nian seidauk aprova iha Parlamentu Nasional maibe sertifikadu rai nian ne’ebe durante ne’e fo ba komunidade nafatin validu tanba bazea ba Dekretu Lei.

“Sertifikadu ne’e validu nafatin to’o Deputadu sira muda lei, mas agora tempu muda Dekretu Lei ne’e liu tiha ona, ne’e duni sertifikadu ne’ebe maka fahe ba komunidade ne’e validu nafatin,” dehan Ministra Justisa Lobato, semana kotuk (31/01), iha Parlamentu Nasional, Dili.

Entertantu Deputada Fernanda Borges dehan deklarasaun hosi Ministra Lobato ne’e problema ida.
“Tanba Ministra Justisa halo deit dekretu lei ida hodi fahe titlus ba ema maibe la tuir prosesu ida,” hateten Deputada Borges.
Nia hatutan katak, iha lei ida aprova hos Parlamentu Nasional iha 2003 Artigu 2 dehan katak ema ne’ebe hakarak halo reclamasaun tenki hatama ona reclamasaun ba Diresaun Nasional Terras no Propriedades (DNTP) maibe kuandu Minsiteriu Justisa fo sai titlu sira ne’ebe maka fahe iha fatin-fatin ne’e la ba hare DNTP sei iha reclamasaun ruma ka lae.

Iha biban hanesan Deputado Mario Viegas Carascalao kestiona mos sertifikadu ba rai ne’ebe MJ fahe ba komunidade liu liu kona ba demarkasaun rai ne’ebe sukat.
“Mais hau hare sertifikadu ne’ebe sira fo ba ne’e rai iha batas-batas nia ninin sira ne’e laiha limiti sira ne’e la tau ne’e halo nusa iha rai ida hanesan ne’e,” Deputado  Carascalau kestiona.